Dźvie dziaŭčyny na elektrasamakatach sutyknulisia u Minsku. U adnoj surjoznyja traŭmy 6

Zdareńnie na vieładarožcy

— Majoj dačce 17 hadoŭ. U toj dzień, 16 žniŭnia, jana katałasia na arendnym elektrasamakacie pa vieładarožcy za Pałacam sportu, — raspavioŭ Viačasłaŭ, baćka paciarpiełaj dziaŭčyny.

Było prykładna 18:15. Składany ŭčastak vieładarožki z vyhibam, ahladnaść abciažaranaja budynkam i drevami.

— Nieviadomaja dziaŭčyna, taksama na elektrasamakacie, ruchałasia nasustrač majoj dačce, jany jechali kožnaja ŭ svaim kirunku. Druhaja dziaŭčyna nie spraviłasia z kiravańniem, pierasiekła padvojnuju raździalalnuju pałasu pamiž darožkami, što pryviało da sutyknieńnia z elektrasamakatam majoj dački, — śćviardžaje surazmoŭca.

— Paśla hetaha nieviadomaja mnie dziaŭčyna ŭstała i pajechała dalej. A maja dačka atrymała surjoznyja traŭmy: zakrytuju ČMT, strasieńnie mozha, składany pierałom levaj ruki. Taksama złamanaja skivica ŭ dvuch miescach sa zrušeńniem adłomkaŭ, paźbivanyja try zuby, byli ŭdary ŭnutranych orhanaŭ i rvanaja rana padbarodka, — raspavioŭ baćka dziaŭčyny.

Nastupstvy

Pa jaho słovach, najbolšuju zaniepakojenaść pryčyniajuć mienavita traŭmy skivicy. Pakul ciažka navat kazać pra toje, jakim budzie adnaŭleńnie.

— Užo praviedzienaja składanaja apieracyja pa ŭstanoŭcy tytanavaj płaściny ŭ skivicu, patrabujecca doŭhaja reabilitacyja, — adznačyŭ jon.

Paśla sutyknieńnia na miesca vyklikali milicyju i chutkuju dapamohu.

— Ja napisaŭ zajavu, druhuju dziaŭčynu šukajuć. Miarkujučy pa ŭsim, jana taksama ruchałasia na arendnym samakacie, i milicyja nakiroŭvała adpaviednyja zapyty ŭ kikšerynhavyja kampanii. Ale z momantu zdareńnia prajšoŭ amal miesiac, a vyniku niama, — pieražyvaje čytač.

Moža być raspačataja kryminalnaja sprava

U najbližejšy čas siamja pavinna atrymać zaklučeńnie miedykaŭ ab stupieni ciažkaści traŭmaŭ, atrymanych dačkoj. Ad hetaha budzie zaležać dalejšaje raźvićcio padziej.

Viadomyja vypadki, kali sutyknieńnie na vieładarožcy z surjoznymi nastupstvami zakančvałasia raspačynańniem kryminalnaj spravy. Da prykładu, tak było paśla taho, jak viełasipiedyst źbiŭ piešachoda na ŭčastku viełamaršrutu kala hatela Marriott na praśpiekcie Pieramožcaŭ. Viełasipiedystu było pradjaŭlenaje abvinavačvańnie pavodle art. 155 Kryminalnaha kodeksa — «Pryčynieńnie ciažkaha abo mienš ciažkaha cialesnaha paškodžańnia pa nieaściarožnaści». Sud pryznaŭ jaho vinavatym i pryznačyŭ pakarańnie ŭ vyhladzie papraŭčych rabot na termin 6 miesiacaŭ z utrymańniem 25 pracentaŭ z zarobku ŭ dachod dziaržavy.

Baćka dziaŭčyny: «Ja prašu dapamahčy»

Šmat što zaležyć ad taho, ci budzie vyśvietlenaja asoba druhoj udzielnicy zdareńnia. Baćka paciarpiełaj dziaŭčyny raźličvaje na dapamohu vidavočcaŭ.

— Tam było šmat ludziej, jakija, mahčyma, niešta bačyli ci rabili fota i videa, — kaža jon.

Źviazacca ź Viačasłavam možna pa telefonie: +375 29 612-23-28.

2

8

0

3

36

3

Nashaniva.com