Barmutaŭ abvinavacili ŭ tym, što jany błakavali vulicy na troch maršach pratestu, a siastru Andreja Volhu Rachubu — u anałahičnym epizodzie, ale tolki na adnoj akcyi.
Usie troje pryznali vinu častkova. Pa słovach Andreja Barmuty, jon «nie viedaŭ, što masavyja mierapryjemstvy, va ŭdziele ŭ jakich jaho abvinavačvajuć, źjaŭlajucca niesankcyjanavanymi». Volha Rachuba, jakaja pracuje redaktaram, raspaviała, što pryjechała da miesca praviadzieńnia maršu «z pryčyny prafiesijnaj cikavaści».
U asnovu abvinavačvańnia lahli zroblenyja na maršach fatahrafii. Svajaki nie nadavali im vialikaha značeńnia, pierasyłali adzin adnamu i abmiarkoŭvali ŭ sacsietkach.
Akramia taho, dziaržabvinavaŭca ŭ intaresach KTUP «Minsktrans» zajaviŭ isk ab kampiensacyi majomasnaj škody, nibyta naniesienaj złačynstvam, — jon maje namier spahnać z abvinavačanych u salidarnym paradku 28340 rubloŭ 31 kapiejku.
Da suda minčuki znachodzilisia na voli pad zakładam. U Aleny i Andreja Barmutaŭ dvoje dziaciej: adno dzicia — maleńkaje, inšaje — niepaŭnaletniaje. Dzieci jość i ŭ Volhi Rachuby.
Sudździa Julija Inčyna pryznała muža i žonku Barmutaŭ i Volhu Rachubu vinavatymi pavodle č. 1 art. 342 KK (udzieł u hrupavych dziejańniach, jakija hruba parušajuć hramadski paradak) i asudziła kožnaha ź ich da «chatniaj chimii» na try hady.
