Paviešanyja pudziły rasijskich sałdataŭ na Charkaŭščynie. Fota: Associated Press.
«Vajna va Ukrainie budzie praciahvacca da poŭnaj parazy Rasii», — narakaŭ Hirkin u svaim videazvarocie da 430 000 padpisčykaŭ u telehramie. — My ŭžo prajhrali, astatniaje — pytańnie času».
Hirkin, były pałkoŭnik rasiejskaj raźviedki, źjaŭlajecca, badaj, samym prykmietnym pradstaŭnikom hrupy pravajennych błohieraŭ, jakija stali łajać Kreml za toje, što jon nie zdoleŭ dasiahnuć svaich taktyčnych metaŭ, bo bajavyja dziejańni va Ukrainie ciahnucca ŭžo siomy miesiac.
Paśla apošniaha kontrnastupleńnia Ukrainy na poŭdni i paŭnočnym uschodzie krainy hetyja błohiery ŭzmacnili krytyku Kramla, asudžajučy dziejańni armii ŭ vajnie i zaklikajučy Uładzimira Pucina abviaścić poŭnamaštabnuju mabilizacyju.
«Jany, biezumoŭna, złujucca ŭsio bolej, i na toje jość važkija i vidavočnyja pryčyny, asabliva pa miery taho, jak pavialičvajecca razryŭ pamiž aficyjnaj linijaj i realnaściu na miescach», — kaža Mark Haleoci, ekśpiert pa pytańniach biaśpieki Rasii.
U sieradu Ukraina pačała niečakanuju kontrataku na Charkaŭščynie, zachapiŭšy niekalki nasielenych punktaŭ. Vajennyja błohiery, jakija časta źjaŭlajucca byłymi vieteranami i majuć suviazi ź pieradavoj, taksama dajuć ujaŭleńnie pra realnyja dziejańni Rasii na miescach. «Niekatoryja ź ich źjaŭlajucca vielmi sumniŭnymi krynicami, ale jość i takija, jak Hirkin, jakija viedajuć, pra što kažuć, i vidavočna padtrymlivajuć suviaź ź ludźmi na froncie ci inšymi daśviedčanymi asobami», — skazaŭ Haleoci.
Rasijski ŭrad nie publikavaŭ danych pra svaje straty z 25 sakavika, kali jon paviedamiŭ pra 1351 zabitaha i 3825 paranienych. Zachodniaja raźviedka ličyć, što z pačatku vajny było zabita abo paraniena da 80 tysiač rasijskich sałdat.
Zamiest hetaha ad pačatku vajny rasijskaje ministerstva abarony nieadnarazova rabiła niepraŭdapadobnyja zajavy pra svaje pośpiechi na poli boju, vychvalajučysia tym, što źniščyła bolš za 40 rakietnych ustanovak HIMARS zachodniaj vytvorčaści (jakich ahułam pastavili Ukrainie 16 štuk — zaŭv. NN), i śćviardžajučy, što całkam źniščyła ŭkrainskija vajskova-pavietranyja siły.
Dziaržaŭnaje telebačańnie, samaja papularnaja krynica infarmacyi ŭ Rasii, taksama praciahvaje malavać viasiołkavuju karcinu rasijskich pośpiechaŭ va Ukrainie. Vystupajučy ŭ sieradu z pramovaj, Pucin paŭtaryŭ, što Rasija «ničoha nie straciła» ŭ vajnie, jakaja, pa jaho słovach, idzie pa płanie.
Fota: Associated Press
Adnak hety aptymizm nie padzialali inšyja, bo Ukraina atačyła Bałakleju i viarnuła nad joj kantrol, ździejśniŭšy toje, što ŭžo było nazvana adnym z samych uražlivych stratehičnych krokaŭ u vajnie i «dobraj navinoj» prezidentam Ukrainy Uładzimiram Zialenskim u sieradu ŭviečary.
«Treba skazać, što ŭ Bałaklei Uzbrojenyja siły Ukrainy całkam pierajhrali naša kamandavańnie», — napisaŭ u svaim telehram-kanale papularny pravajenny rasijski błohier «Staršie Eddy».
Aŭdytoryja hetaha kanała ŭ Telegram, jak i aŭdytoryja inšych vajennych błohieraŭ, pavialičyłasia z pačatku ŭvarvańnia z prykładna 28 tysiačaŭ u studzieni da 500 tysiačaŭ, pa danych Tgstat.
Prakramloŭski vajskovy žurnalist Alaksandr Koc, pakazvajučy na adsutnaść reakcyi Rasii na ŭkrainski nastup, u sieradu abvinavaciŭ ułady va ŭtojvańni «drennych navin» pra situacyju na miescach. «Ź sistemaj, u jakoj načalstva nie lubić drennych navin, a padnačalenyja nie lubiać chvalavać načalnikaŭ, treba niešta ŭžo rabić», — skazaŭ jon.
Apošniaje nastupleńnie Ukrainy taksama pryviało da abnaŭleńnia zaklikaŭ pramaskoŭskich nacyjanalistaŭ da ŭsieahulnaj mabilizacyi, suprać čaho da hetaha času vystupaje Pucin, niahledziačy na prykmiety taho, što rasijskaja armija adčuvaje vostry niedachop novych sałdataŭ.
«Mabilizacyja — heta, prama skažam, naš adziny šaniec paźbiehnuć sakrušalnaj parazy», — napisaŭ Andrej Marozaŭ, jašče adzin papularny błohier.
Ciapier Kreml, vidavočna, hatovy pryniać krytyku ŭ svoj adras z boku hrupy pravajennych błohieraŭ. Hirkin nieadnarazova zaklikaŭ da zvalnieńnia ministra abarony i blizkaha paplečnika Pucina Siarhieja Šajhu, u adnym z pastoŭ zaklikajučy pakarać śmierciu ministra praz rasstreł.
Na dumku ekśpiertaŭ, pamiarkoŭnaść Kramla da kamientaroŭ błohieraŭ ździŭlaje, uličvajučy niadaŭna pryniatyja zakony, zhodna ź jakimi krytyka vajny moža karacca pazbaŭleńniem voli na termin da 15 hadoŭ.
Pavieł Łužyn, niezaležny rasijski vajenny ekśpiert, ličyć, što błohieraŭ «nie čapajuć», bo jany dajuć mahčymaść častcy rasijskaha nasielnictva vypluchnuć svoj hnieŭ z nahody niaŭdač va Ukrainie. «Kreml zanadta napałochany, kab prosta ihnaravać nacyjanalistyčnuju častku nasielnictva», — skazaŭ Łužyn, dadaŭšy, što niekatoryja z błohieraŭ, vierahodna, dziejničajuć z maŭklivaj zhody śpiecsłužbaŭ.
Haleoci taksama skazaŭ, što «mnohija błohiery byli źviazanyja z vajennymi abo siłavymi strukturami abo karystalisia ich zastupnictvam».
Ciapier Hirkin i inšyja vajennyja błohiery, chutčej za ŭsio, buduć praciahvać krytyku, bo kryvavy vajenny nastup Pucina va Ukrainie zahruz. «Nie čakajcie vialikich pieramoh u najbližejšyja 2-3 miesiacy», — pisaŭ Hirkin u adnym z pastoŭ na hetym tydni. — Kali našy kramloŭskija starcy nie źmieniać svaju taktyku, to ŭvieś hety čas my budziem nazirać katastrafičnyja parazy».
Hirkin admoviŭsia ad kamientaroŭ dla hetaha artykuła, zajaviŭšy, što ličyć zachodnija ŚMI «svaim voraham».
Čytajcie jašče:
Nad Bałaklejaj uźnialisia ŭkrainskija ściahi
Rasija paluje na estonskaha vajennaha robata THeMIS. Tłumačym, u čym jaho ŭnikalnaść
Hurt «Tiń Soncia» zapisaŭ pieśniu pa-biełarusku dla Pałka Kalinoŭskaha
