Hrupa ŭkrainskaha desantu vysadziłasia ŭ rajonie Enierhadara, jaki znachodzicca na padkantrolnaj Rasii terytoryi Zaparožskaj vobłaści, paviedamiŭ «Interfaksu» kiraŭnik akupacyjnaj administracyi horada Alaksandr Vołha.
«Adbyłasia vysadka ŭkrainskaha desantu, jany na hety momant źnieruchomlenyja, lažać na dačnym pasiołku. Pracuje naša avijacyja pa ich. Raźviedčyki vyličyli miesca ich znachodžańnia, na hety momant nanosicca ahniavoje paražeńnie», — skazaŭ Vołha.
U toj ža čas zakonny mer Enierhadara Dźmitryj Arłoŭ paviedamlaje, što ź piaci hadzin ranicy horad znachodzicca pad pastajannym abstrełam.
«Ź piaci hadzin ranicy nie spyniajucca pastajannyja minamiotnyja abstreły horada. Čutnyja aŭtamatnyja čerhi. Viadoma ab traplańni ŭ niekalki cyvilnych abjektaŭ. Jość paciarpiełyja! Kolki mienavita, vyśviatlajem», — napisaŭ Dźmitryj Arłoŭ u svaim telehram-kanale.
Pra abstreły Enierhadara taksama paviedamlajuć u sacsietkach miascovyja žychary.
Infarmacyju pra heta paćviardžaje i karespandent rasijskaha ahienctva «Interfaks», jaki znachodzicca ŭ horadzie.
«Abstreł pačaŭsia prykładna ŭ 6:00. Vybuchi hučać u roznych častkach horada ź pieryjadyčnaściu ŭ 3—4 chviliny, u tym liku ŭ žyłych mikrarajonach i kala administracyjnych budynkaŭ u centry horada», — pryvodzić ahienctva słovy svajho karespandenta.
U svaju čarhu, Ministerstva abarony Rasii raspaŭsiudziła takoje paviedamleńnie: «Kala 6 hadzin ranicy ŭkrainskija vojski dźviuma dyviersijnymi hrupami da 60 čałaviek na siami łodkach vysadzilisia na ŭźbiarežžy Kachoŭskaha vadaschovišča za try kiłamietry na paŭnočny ŭschod ad Zaparožskaj AES i raspačali sprobu zachopu elektrastancyi. Pryniatyja miery pa źniščeńni praciŭnika, u tym liku z vykarystańniem vajskovaj avijacyi», — havorycca ŭ paviedamleńni.
Tym časam misija MAHATE ruchajecca na Zaparožskuju AES, raźmieščanuju ŭ Enierhadary.
