Fota: AP

Fota: AP

Centralny bank Zimbabve vypuściŭ u abarot załatyja maniety, košt jakich budzie vyznačacca nie naminałam, a rynkavaj canoj zołata.

Vartaść kožnaj maniety roŭnaja canie ŭncyi zołata plus 5% na pakryćcio vydatkaŭ na čakanku. U kancy minułaha tydnia ŭncyja zołata kaštavała 1724 dalary ZŠA.

Kiraŭnik zimbabvijskaha Centrabanka Džon Manhudźja kaža, što hetymi manietami možna raspłačvacca za zvyčajnyja pakupki — kali ŭ kramie znojdziecca rešta

Manietu nazvali «Mosi-oa-Tuńja», što aznačaje «dym, jaki hrukoča» — tak na movie miascovaha naroda łozi nazyvajecca vadaspad Viktoryja.

U lipieni hadavaja inflacyja ŭ Zimbabve pieravysiła 190%, i centralny bank padniaŭ ulikovuju staŭku da 200%. Kurs zimbabvijskaha dalara ŭ dačynieńni da inšych valut daŭno i imkliva lacić uniz.

13-14 hadoŭ tamu, pry Robiercie Muhabe ŭsio było jašče horš. Słova «Zimbabve» stała sinonimam poŭnaha finansavaha krachu i zalimitavaj inflacyi.

Ułady navat pierastali publikavać danyja ab inflacyi, byli tolki ekśpiertnyja acenki z boku, i pa adnoj ź ich u 2008 hodzie inflacyja skłała 89,7 siekstyljona adsotkaŭ. Siekstyljon — heta ličba z 21 nulom.

Hrošy abiasceńvalisia chutčej, čym ułady dadavali na ich nuli. Hetaja honka skončyłasia banknotaj u sto tryljonaŭ, a ŭ vyniku ŭ 2009 hodzie Zimbabve prosta admoviłasia ad svajho dalara i pierajšła na raźliki ŭ zamiežnych valutach.

U 2019 hodzie Zimbabve znoŭ uviała nacyjanalnuju valutu, ale jaje rynkavy kurs adrazu sa startu apynuŭsia našmat nižejšym za aficyjny, a da ciapierašniaha času jon abvaliŭsia ŭ dačynieńni da dalara ZŠA i inšych zamiežnych valut bolš čym u 150 razoŭ.

Клас
5
Панылы сорам
10
Ха-ха
7
Ого
1
Сумна
0
Абуральна
2