Usie kadry ź sieryjała: kino-teatr.ru
Heta historyja paśpiachovaha advakata Miki Cholera, čyj «ofis» — zadniaje siadzieńnie mašyny marki «Linkaln» i mietady jakoha nie nadta standartnyja. Avaryja pakinuła jaho za bortam prafiesii, ale novaja sprava ab zabojstvie daje šans viarnucca ŭ šychty. Sieryjał zasnavany na adnajmiennym ramanie Majkła Koneli.
Choler, jakoha vydatna hraje Manuel Harsija Rulfa, na praciahu ŭsiaho sieryjała sutykajecca z mnostvam prablem, i pieršaja ź ich — heta razvod. Chutka my daviedvajemsia, što advakat pieražyvaje jaho dvojčy, i ad pieršaha šlubu z prakurorkaj Mehi Makfiersan u Cholera jość dačka Chejli. My znajomimsia z Mehi, kali jana svarycca z hałoŭnym hierojem praz toje, što jon pozna pryjechaŭ da Chejli, ale ź ciaham času razumiejem, što pamiž hetymi dvaimi jašče jość pačućci, piša Collider.
Pa miery raźvićcia dziejańnia kachańnie pamiž Choleram i Mehi adradžajecca, i ich adnosiny znoŭ pieražyvajuć roskvit. Bližej da kanca sieryjała vam uvohule pačnie zdavacca, što byłych sužencaŭ čakaje novaja ščaślivaja budučynia.
Sieryjał daśleduje, jak razvod pieražyvaje Chejli, jak jana daje rady rasčaravańniu, złości i razhublenaści. Aŭtary «Linkalna» dla advakata» akuratna padychodziać da temy i tamu dajuć nam mahčymaść pabačyć, jak razvod upłyvaje nie tolki ŭłasna na byłych sužencaŭ, ale i na ich rodnych, i čamu ŭ šlubie časam usio składvajecca nie tak, jak my chočam.
Choler pieražyŭ i druhi razvod, na hety raz ź jurystkaj Łornaj Krejn, jakaja pracuje razam ź im, dy jašče i zaručanaja ź ich ahulnym kaleham-śledčym. Pamiž Choleram i Krejn taksama jość chimija, ale heta vyklučna płataničnyja adnosiny, sam ža były šlub hieroi ŭsprymajuć jak pamyłku. Im kamfortna pracavać razam, jany i paśla razvodu kłapociacca i padtrymlivajuć adzin adnaho. Heta, biezumoŭna, pazityŭny prykład rasstavańnia.
Nastupnaja ciažkaja tema ŭ sieryjale — heta zaležnaść. Upieršyniu my daviedvajemsia pra hetuju asablivaść Cholera, kali paśla niaščasnaha vypadku padčas siorfinhu toj traplaje pad zaležnaść ad abiazbolvajučych i ałkaholu. Ź ciaham času jon sustrakaje novuju klijentku, Izi Lets, jakaja taksama zmahajecca z zaležnaściu, i pamiž imi ŭźnikaje ciopłaje siabroŭstva.
Ale ž my ŭsio-taki majem spravu ź jurydyčnaj dramaj, tamu ŭ sieryjale šmat śmierciaŭ. Hałoŭnaja siužetnaja linija źviazanaja z raspracoŭščykam hulniaŭ Trevaram Elijatam, jakoha padazrajuć u zabojstvie žonki i jaje kachanka. Elijat cudoŭna vystupaje ŭ roli zasmučanaha muža, dy i Choler vieryć u jaho nievinavataść, ale nasamreč hety piersanaž składaniejšy, čym vyhladaje zvonku.
My nie pamylimsia, kali skažam, što «Linkaln» dla advakata» — heta dakładna jurydyčnaja drama, u jakoj šmat miesca addadziena spravam hałoŭnaha hieroja. Tym nie mienš, pad kryminalnym fasadam hetaj historyi chavajecca šmat važnych tem.
Rejtynhi na vialikich suśvietnych resursach:
IMDB — 7,7 / 10,
Rotten Tomatoes — 75%.
Što pahladzieć. «Raździaleńnie» — hipnatyzujučy ofisny tryler z vysokimi rejtynhami i zachoplenymi vodhukami
