Fota tut i dalej: sacsietki Sajkova
Piedyjatr, jaki pajšoŭ u narkałohiju
Sajkovu 61 hod, jon rodam ź Irkucka. Syn vajennaha miedyka. Adna ź jaho babul była «šaptuchaj» u Zabajkalli.
Z šaści hod Sajkoŭ žyvie ŭ Minsku. U staličnym miedinstytucie jon vučyŭsia na piedyjatra, ale paralelna zacikiviŭsia psichijatryjaj, ź jakoj i źviazaŭ svaju karjeru.
Sajkoŭ pracavaŭ narkołaham pa raźmierkavańni. A ŭ 1990-m staŭ zahadčykam 1-ha narkałahičnaha adździaleńnia Haradskoha narkałahičnaha dyspansiera Minska.
Jon razumieŭ, što bieź psichijatryi ŭ lačeńni ałkahalizmu dabicca pośpiechu budzie składana.
«Pacyjenty, jakija nie chacieli lačycca, ličyli tak: nas truciać. Chavali tabletki za ščaku, potym praz akno vyploŭvali. Prychodzić viasna, sychodzić śnieh, i vakoł narkaadździaleńnia byccam dobry hrad vypaŭ — usio tabletkami ŭsiejana», — apisvaŭ joj situacyju ŭ intervju.
Sajkoŭ — kandydat miedycynski navuk. Svoj mietad lačeńnia jon zasnavaŭ na padstavie mietadu emacyjna-stresavaj psichaterapii narodnaha doktara SSSR Daŭženki.
Pa maładości Sajkoŭ, darečy, cikaviŭsia hipnozam. Navyki treniravaŭ na svajoj maci.
«Nardzin» i kadziravańnie ŭ sielsaviecie
«Nardzin» Sajkoŭ adkryŭ 19 hod tamu. Za hety čas miedcentr staŭ adnoj z topavych pryvatnych klinik — z ułasnym fitnies-centram, apieracyjnym adździaleńniem i histałahičnaj łabaratoryjaj.
Ale ŭ bijahrafii doktara byli roznyja historyi. U 2012 hodzie, naprykład, aršanskaja milicyja z dapamohaj Sajkova «dobraachvotna-prymusova» kadziravała ludziej ad ałkahalizmu. Źbirali pituščych z usiaho sielsavieta ŭ domie kultury i za nievialikija hrošy pravodzili sieansy.
«Čałavieku, jaki trapiŭ u sietki ałkaholnaj zaležnaści, abaviazkova treba dapamahčy, a časam navat i suprać jaho voli», — kamientavała heta milicyja.
Bamond i barada
Doktar paśpieŭ pasprabavać siabie i na estradzie. Udzielničaŭ u šou «Dźvie zorki» na ANT. I paśla staŭ častkaj staličnaha bamondu. Chadziŭ na pryjomy, byŭ viadučym pieradač, nieadnarazova śpiavaŭ na telekancertach. Zapisvaŭ duety ź biełaruskimi artystami i aŭtarskija pieśni — adna ź ich nazyvałasia «Zakadziruju».
Z baradoj Sajkoŭ chodzić sa studenctva. Tolki adnojčy zhaliŭ jaje.
«Kali ja atrymlivaŭ raźmierkavańnie, mnie namieśnik ministra achovy zdaroŭja nie daŭ jaho. Maŭlaŭ, ty chočaš być uračom abo lesarubam? Vyjšaŭ, telefanuju maci. Jana mnie: «Synočak, baradu možna i znoŭ adhadavać, a raźmierkavańnie raz u žyćci». Zhaliŭ», — zhadvaŭ jon.
Žonka i syn — taksama miedyki
U volny čas doktar lubić chadzić na palavańnie.
«Na palavańni mužčyna prajaŭlaje svoj hałoŭny instynkt — zdabytčyka, realizuje tam svaju brutalnaść», — razvažaŭ Sajkoŭ.
Na zaharadnym leciščy ŭ Brasłavie ŭ jaho svaja haspadarka — kački, husi, trusy (jon navat sprabavaŭ vyvieści novy vid).
Žonka viadomaha doktara taksama pracuje ŭ miedycynie — piedyjatram. Jany razam vučylisia ŭ instytucie. Pa śladach baćki pajšoŭ starejšy syn Anton — staŭ narkołaham. Pracuje ŭ Haradskim kliničnym narkałahičnym dyspansiery.
**
Vobšuk u «Nardzinie» ŭčora pravodziŭ Departamient finansavych rasśledavańniaŭ. Była vyniata dakumientacyja. Praca miedykaŭ nie spyniałasia.
Samoha Sajkova razam z žonkaj zatrymali na zaharadnym leciščy, ale paśla adpuścili.
Raniej ułady spynili pracu miedcentraŭ «Łade» i «Klinika A1».
