«Pahladzi na mianie! Vočy nie advodź, što ty vočy advodziš?»
U 2017 hodzie namieśnik pastajannaha pradstaŭnika Rasii pry AAN Uładzimir Safrankoŭ hruba adkazaŭ na abvinavačvańni ŭ padtrymcy prezidenta Siryi Bašara Asada.
U svajoj zajavie Safrankoŭ źviarnuŭsia da pradstaŭnika Vialikabrytanii ŭ AAN Mećju Rajkrafta, nazyvajučy jaho na «ty».
«Vy spałochalisia, son stracili, što my budziem supracoŭničać sa Złučanymi Štatami. Vy hetaha baiciesia. Usio robicie dla taho, kab heta ŭzajemadziejańnie było padarvanaje… Pahladzi na mianie, vočy nie advodź, što ty vočy advodziš?» — skazaŭ Safrankoŭ Rajkraftu.
«Ty siońnia kazaŭ, spadar Rajkraft, nie pa paradku dnia pasiadžeńnia, abražaŭ Siryju, Iran, Turcyju, inšyja dziaržavy… Nie śmiej abražać Rasiju bolš!» — dadaŭ jon.
Rasijskaja internet-supolnaść tady była ahałomšanaja chulihanskaj rytorykaj rasijskaha dypłamata. U svaju čarhu, prychilniki vitali jaho jak uzychodziačuju zorku dypłamatyi.
U Kramli vykazvańni dypłamata ŭchvalili. Pres-sakratar Pucina Dźmitryj Piaskoŭ zajaviŭ, što było b horš, kali b Safrankoŭ prademanstravaŭ adsutnaść rašučaści.
«Ničoha abraźlivaha skazana nie było. Sapraŭdy, temy dyskusii vostryja, jany čaściakom tyčacca sutnaści i budučyni mižnarodnych adnosin. Prajava miakkaciełaści ŭ budučyni niebiaśpiečnaja nastupstvami, tamu lepš intaresy Radzimy adstojvać siońnia», — skazaŭ Piaskoŭ.
Pa słovach aficyjnaj pradstaŭnicy MZS Rasii Maryi Zacharavaj, vykazvańni dypłamata byli krykam adčaju.
«Adzin čałaviek zaklikaje inšaha adkazać: što vy robicie, pra što vy kažacie, jak vam nie soramna, vy ŭśviedamlajecie, kudy vy zavodzicie mižnarodnuju supolnaść?» — kamientavała Zacharava.
«Debiły…»
Kiraŭnik MZS Rasii publična vykarystoŭvaŭ hetaje słova sama mieniej dvojčy.
«Debiły, bł****», — skazaŭ Łaŭroŭ na pres-kanfierencyi ź ministram zamiežnych spraŭ Saudaŭskaj Aravii Adelem al-Džubiejram u 2015 hodzie.
Chutčej za ŭsio, havaryŭ Łaŭroŭ heta nie samomu ministru, a žurnalistam. Pierad tym jak vyłajacca, Łaŭroŭ adkazaŭ na pytańnie rasijskaj žurnalistki, jakaja spytała: «Jak idzie padrychtoŭka da šyrokaj sustrečy pa siryjskim urehulavańni?» Adnak, pa słovach ministra, navat sama pastanoŭka takoha pytańnia była niekarektnaja.
«My nie płanujem nijakuju šyrokuju sustreču siryjskaj apazicyi — heta niapravilnaja infarmacyja», — padkreśliŭ dypłamat. Taksama paśla svajoj karonnaj frazy Łaŭroŭ zrabiŭ zaŭvahu ludziam, što siadzieli ŭ zale: «My vam nie pieraškadžajem?»
Fraza stała lehiendarnaj i chutka syšła ŭ narod. Pavodle samaj raspaŭsiudžanaj viersii, Łaŭrova tak razzłavali fotakarespandenty, jakija vybiehli pierad im i stali fatahrafavać. Praz hod paśla hetaha vypadku rasijski ministr zajaviŭ, što naohuł ni na kaho nie złavaŭsia.
«Ja potym hladzieŭ, ja tam spakojna siadžu. Nu, prabačcie, nie ja adzin traplaju ŭ situacyju, kali dumajuć, što mikrafon vyklučany. Kemieran, potym Abama taksama traplaŭ», — kazaŭ Łaŭroŭ.
Pres-sakratar prezidenta Rasii Dźmitryj Piaskoŭ, adkazvajučy ŭ śniežni 2016 hoda na pytańnie viadučaha NTV: «Jak by vy pierakłali na vašu movu znakamituju frazu Łaŭrova», adkazaŭ: «Viadoma, ja b skazaŭ: «Kazły, n****!».
«Debiły — 2»
Praz hod, u 2016-m, ministr zamiežnych spraŭ Rasii Siarhiej Łaŭroŭ nazvaŭ apieratara infarmahienctva Reuters debiłam. Heta adbyłosia ŭ Hamburhu, dzie rasijski ministr znachodziŭsia na sustrečy Rady ministraŭ zamiežnych spraŭ ABSIE.
Prachodziačy pa kalidory, Łaŭroŭ paviarnuŭsia da kamiery Reuters sa słovami: «What do you want?» («Čaho chočaš?»). Adrazu paśla hetaha ministr dadaŭ: «Debiły».
Aficyjny pradstaŭnik MZS Rasii Maryja Zacharava paźniej zajaviła, što Siarhiej Łaŭroŭ nikoha nie abražaŭ.
«Jon spytaŭ u apieratara z uklučanaj kamieraj, čaho jon choča, apieratar ničoha nie skazaŭ i praciahvaŭ zdymać, ministr prajšoŭ svaim šlacham i ničoha nie kazaŭ», — skazała jana.
«Who are you to f**king lecture me?»
Pavodle brytanskaj presy, 12 žniŭnia 2008 hoda padčas rasijska-hruzinskaj vajny Łaŭroŭ na sustrečy z kiraŭnikom brytanskaha MZS Milibendam skazaŭ «Who are you to f**king lecture me?» («Chto ty taki, kab čytać mnie, b****, natacyi?!»).
Ale, pa słovach Łaŭrova, jon nie abražaŭ Milibenda, i cytatu žurnalisty pieradali niapravilna. Łaŭroŭ skazaŭ paźniej: «Jadranaje słoŭca ja ŭžyŭ nie ad siabie ŭ jaho adras, a cytujučy adnaho našaha kalehu, jaki napiaredadni prylacieŭ z Tbilisi».
Pa słovach Łaŭrova, dypłamat, što prybyŭ z Tbilisi, skazaŭ rasijskamu ministru: «Ja tolki što z Tbilisi, Saakašvili niejki «f**king lunatic» («******* łunacik»).
«Voś dzie hetaje słova było vymaŭlenaje. A Milibend sprabavaŭ pierakanać mianie, što z Saakašvili treba damaŭlacca», — skazaŭ paźniej Łaŭroŭ žurnalistam.
«Vy što, maci Tereza?»
Skandalnymi vykazvańniami adznačyŭsia i pradstaŭnik Rasii ŭ AAN, niabožčyk Vital Čurkin.
Arabskija ŚMI śćviardžali, što rasijski dypłamat pahražaŭ Kataru.
«Kali vy jašče raz zahavorycie sa mnoj u takim tonie, takoj rečy, jak Katar, paśla siońniašniaha dnia bolš nie budzie», — nibyta adkazaŭ Čurkin pradstaŭniku Katara za krytyku błakavańnia Rasijaj rezalucyi Rady Biaśpieki AAN pa Siryi.
«Asabliva dziŭnym mnie padałosia vystupleńnie pradstaŭnika Złučanych Štataŭ, jakaja pabudavała svajo vystupleńnie, jak byccam jana maci Tereza», — kazaŭ Čurkin byłomu pastajannamu pradstaŭniku ZŠA pry AAN Samancie Paŭer, jakaja abvinavačvała Rasiju ŭ vajennych złačynstvach u Siryi.
Zacharava paraŭnała prezidenta Sierbii z hierainiaj filma «Asnoŭny instynkt»
Aficyjnaja pradstaŭnica MZS Rasii Maryja Zacharava spravakavała dypłamatyčny skandał, apublikavaŭšy na svajoj staroncy ŭ Facebook dopis, u jakim vyśmiejała sustreču prezidentaŭ Sierbii i ZŠA Alaksandra Vučyča i Donalda Trampa.
4 vieraśnia Vučyč sustreŭsia z Trampam u Vašynhtonie. Adnu z fatahrafij z hetaj sustrečy prakamientavała Maryja Zacharava. Jana paraŭnała pieramovy ŭ Biełym domie z dopytam, raźmiaściŭšy fatahrafiju sustrečy Vučyča z Trampam pobač z kadram ź filma «Asnoŭny instynkt».
«Kali vas paklikali ŭ Bieły Dom, a kresła pastavili tak, byccam vy na dopycie, siadajcie jak na fota #2. Kim by vy ni byli. Prosta paviercie», — napisała pradstaŭnica rasijskaha MZS.
Publikacyja vyklikała krytyku z boku Sierbii. Prezident krainy nazvaŭ paraŭnańnie pradstaŭnika rasijskaha MZS «prymityvizmam» i nahadaŭ, što Sierbija była adzinaj krainaj, jakaja nie ŭviała sankcyi suprać Rasii.
«Padśviadomaść bolš za ŭsio kaža pra čałavieka, bolš za ŭsio pra siabie skazała Maryja Zacharava, prymityvizm i sproščanaść bolš za ŭsio kažuć pra jaje i pra tych, chto heta apublikavaŭ. Ja pra heta kazać nie budu, chaj jany sami hetym zajmajucca», — skazaŭ Alaksandr Vučyč u efiry sierbskaha telekanała Pink-TV.
«Nie ceniać, što Sierbija — vajenna niejtralnaja kraina i nie źbirajecca ŭstupać u NATA, adzinaja kraina, jakaja kuplaje haz i zbroju ŭ ich, ja nie budu tłumačyć čužy prymityvizm», — adznačyŭ Vučyč.
Paźniej sierbskaje MZS zaprasiła rasijskaha ambasadara «dla dačy vusnych tłumačeńniaŭ». U vyrašeńnie situacyi ŭklučyŭsia kiraŭnik MZS Rasii Siarhiej Łaŭroŭ.
Sama Zacharava paźniej pryniesła prabačeńni.
«Prašu prabačeńnia, ale moj dopis niapravilna zrazumieli! Adzinaje, što ŭ im źmiaščałasia, — nieprymańnie napyšlivaha staŭleńnia z boku «vyklučnych». Pratakolnyja chitryki stali adnym z pryjomaŭ, na jakija rehularna iduć amierykanskija čynoŭniki, kab štučna stvaryć bačnaść ułasnaj vyklučnaści. A heta nieprymalna», — patłumačyła jana.
«Respublikancy pieramahli, dziakujučy jaŭrejam»
Skandał z Zacharavaj byŭ nie adziny. U 2016 hodzie ŭ efiry rasijskaha telebačańnia jana zajaviła, što pieramoha respublikancaŭ u ZŠA adbyłasia, «dziakujučy jaŭrejam».
«Kali ty chočaš daviedacca, što budzie ŭ Amierycy, treba z kim razmaŭlać? Treba razmaŭlać ź jaŭrejami, naturalna. Nu samo saboj! Jany mnie skazali takuju reč: «Maračka, razumiejecie, my, viadoma, damo Klintan. Ale respublikancam my damo ŭ dva razy bolš». Usio! Pytańnie było zakrytaje asabista dla mianie!» — skazała Zacharava, kryŭlajučy jaŭrejski akcent.
Jašče adzin skandał na amierykanskuju tematyku z udziełam Zacharavaj — jana śćviardžała, što bin Ładena prymali ŭ Biełym domie.
«Uspomnicie hetyja fantastyčnyja, fiejeryčnyja fatahrafii, jak u Biełym domie prymali bin Ładena. Heta ž kłasičny łabizm u samym dakładnym sensie hetaha słova», — kazała Zacharava ŭ 2017 hodzie.
Fatahrafij u efiry nie pakazali. Akazałasia, što Zacharava havaryła pra falšyvuju vyjavu, jakuju raspaŭsiudžvali prychilniki Donalda Trampa.
«Jak syr rakfor — taki trochi śmiardziučy»
Padčas niadaŭniaha bryfinhu pa vynikach pieršaha raŭnda pieramovaŭ pamiž Vašynhtonam i Maskvoj pa tak zvanych «harantyjach biaśpieki dla Rasii» namieśnik kiraŭnika MZS Rasii Siarhiej Rabkoŭ paspračaŭsia z žurnalistam Bloomberg i paraŭnaŭ amierykanskaje ahienctva sa śmiardziučym syram.
Žurnalist zajaviŭ, što dla Bloomberg «važnyja nie rejtynhi, a važnaja ekanamičnaja infarmacyja, nieabchodnaja inviestaram».
Pa słovach žurnalista vydańnia, ahienctva paviedamlaje, jak infarmacyju z Amieryki, tak i z Rasii.
U adkaz na hetuju repliku Siarhiej Rabkoŭ pacikaviŭsia ŭ žurnalista, adkul jamu viadoma, što nieabchodna inviestaram. Jon vykazaŭ sumnieŭ, što vydańnie abjektyŭna pravodzić adpaviednyja daśledavańni.
«Bloomberg pieradaje amierykanskuju pazicyju ŭ jaje mejnstrymnym vykładzie i frahmientarna daje rasijskuju pazicyju: kali heta zručna albo kali heta moža skazić… Viedajecie, jak syr rakfor — taki źlohku śmiardziučy. Voś čym zajmajecca Bloomberg, padajučy rasijskuju pazicyju», — zajaviŭ namieśnik ministra zamiežnych spraŭ Rasii.
«NATA treba źbirać manatki»
Rasija pry adsutnaści damoŭlenaściaŭ pa harantyjach biaśpieki moža źviarnucca da inšych srodkaŭ dla zabieśpiačeńnia bałansu sił i «zastrašvańnia apanientaŭ», zajaŭlaŭ toj samy Rabkoŭ.
«My budziem vymušanyja pry adsutnaści nieabchodnych i terminovych damoŭlenaściaŭ pa pravavych harantyjach vykarystać inšyja srodki dla zabieśpiačeńnia patrebnaha bałansu, kali chočacie, dla zastrašvańnia apanienta — nie ŭ płanie stvareńnia niejkich pahroz, a ŭ płanie strymlivańnia», — skazaŭ jon.
NATA bolš nie zmoža «adciskać» Rasiju, takoje stanovišča — u minułym, zajaviŭ Siarhiej Rabkoŭ.
Na dumku dypłamata, u situacyi, kali NATA ciaham apošnich dziesiacihodździaŭ sprabuje «adcisnuć» Maskvu i pieramiaścić jaje na druhija roli ŭ mižnarodnaj palitycy, vysoŭvać u jaje bok niejkija patrabavańni ab sastupkach niedapuščalna.
«Bolš nie atrymajecca. Heta ŭsio ŭ minułym. I raniej nie vielmi atrymlivałasia, a ciapier hetamu prosta pakładzieny kaniec <…> Tak što NATA treba źbirać manatki i adpraŭlacca na rubiažy 1997 hoda», — raspavioŭ Rabkoŭ.
«Rasija doŭha zaprahała, ale ciapier čakaje, što adkaža furman na toj pavozcy»
Nu a niadaŭna Łaŭroŭ vielmi jaskrava i aleharčna apisaŭ adnosiny Rasii i NATA.
«Našamu ciarpieńniu pryjšoŭ kaniec. My vielmi ciarplivyja. Ale vy viedajecie ž, što my doŭha zaprahajem? Voś zaprahali my vielmi doŭha, čas nam užo jechać. Voś čakajem, kali furman na toj pavozcy adkaža kankretna na našy prapanovy», — skazaŭ jon.
Čytajcie taksama: «My vośmy hod vajujem i pryvykli». Što va Ukrainie dumajuć pra mahčymaje rasijskaje i biełaruskaje ŭvarvańnie?
