Čym žyvuć hetyja rajony siońnia? Pra heta my raspytali žycharoŭ Malinaŭki i Paŭdniovaha Zachadu: repiera Valika, śpiavačku Barbaru Huzarevič i teatralnaha krytyka Alaksieja Strelnikava.
Usie my viedajem, što kadry z hetych spalnikaŭ skłali salidnuju častku vizualnaha šerahu klipa «Słova pacana» Maksa Karža. Treba skazać, što paŭdniova-zachodniaja častka Minska ŭ pryncypie maje reputacyju repierskaj. Heta nam paćviardžaje i repier Valik, jaki žyvie tut z pačatku nulavych.
«Ja niaredka čuŭ: «A, ty z Malinaŭki, dyk usie repiery adniekul adtul». I tut jość ziernie praŭdy. Adsiul vyjšaŭ Arciom Lil Ice, viadomy jak Iceon. Kali mnie było 13 hod, jaho, zdajecca, viedaŭ kožny, chto byŭ zacikaŭleny žanram. Byŭ hurt Smoke Box. Bitboksier Nigga taksama z hetych krajoŭ. A jašče raniej tut pracavała studyja hukazapisu «Malibu», dzie ŭ tym liku zapisvalisia rep-vykanaŭcy. Ciapier, praŭda, jany pierajechali bližej da centra».
Malibu – heta, darečy, jašče adna miascovaja nazva Malinaŭki. Naroŭni z Maline.
Valik pakul nie pryśviačaŭ trekaŭ svajmu rajonu, kali nie ličyć frahmientarny ŭdzieł u stvareńni muzyki dla karotkamietražki režysiora Andreja Śviatłova, jakuju jon zdymaŭ tut – stužka pakul na stadyi postpradakšnu. Ale pieršy albom chłopiec napisaŭ, špacyrujučy pa rodnych vulicach: jon nikoli nie prydumlaje treki doma, siedziačy ź listom papiery. Prosta vychodzić na śviežaje pavietra, hulaje i niešta načytvaje na dyktafon.
«Maci raskazvała, kali baćka ŭpieršyniu pryvioz jaje ŭ našu budučuju kvateru ŭ Malibu, jaje pieršaja reakcyja była: «U jakoje ž bałota ja trapiła!» U 2002 hodzie tam, dzie zaraz mietro Malinaŭka, nie było ničoha. Niedzie ŭ 2003-m u lasočku, dzie ciapier staić ProStore, ja chavaŭ svajho pamierłaha chamiaka Ëryka».
Valancin Jankavy,
ci Valik, rep-vykanaŭca