8000 BYN dastalisia prajektu KaliLaska

U kancy listapada płatforma Talaka razam z partałam Onliner.by, kampanijaj Velcom i hrupaj kampanij Gurtam zapuścili nacyjanalny interaktyŭny konkurs u farmacie realici-šou #Paskareńnie. U konkursie brała ŭdzieł 216 prajektaŭ.

Meta konkursu — natchnić haradžan na sumiesnaje samastojnaje rašeńnie pryncypovych prablem, palepšyć jakaść žyćcia ŭ haradach i nasielenych punktach Biełarusi.

U Naminacyi «Hran-pry» pieramoh dabračynny prajekt KaliLaska. Za jaho prahałasavała bolšaść členaŭ žury. Prajekt taksama pieramoh u naminacyi «Narodny vybar». Praz kraŭdfandynhavuju płatformu www.talaka.org hety prajekt «rublom» padtrymała najbolšaja kolkaść biełarusaŭ.

Arhanizatary prajektu źbirajuć jakasnyja, ale ŭžo nie patrebnyja ludziam rečy, kab pieradać tym, chto ŭ ich maje patrebu. Padapiečnyja — invalidy, šmatdzietnyja siemji, vychavancy internataŭ i prosta ludzi, jakija majuć patrebu ŭ hetych rečach. Na praciah svaich dobrych spraŭ kamanda prajekta atrymała vosiem tysiač rubloŭ ad miecenataŭ, a taksama ŭsie srodki sabranyja na kraŭdfandynhavaj płatformie.

A chantar, jaki pryvioŭ na konkurs prajekt KaliLaska, jak i abiacali arhanizatary, atrymaŭ tysiaču rubloŭ.

Naminacyja «Najlepšy prajekt»

Pieramoh #KidsHealth — biaspłatny videakurs pa niejrafitnesie dla dziaciej ź sindromam deficytu ŭvahi i hipieraktyŭnaści.

Naminacyja velcom «Kamfort»

Prysudžałasia za ŭvahu prajekta da kamfortnych pieramienaŭ u žyćci biełarusaŭ. Pieramoh prajekt 114.by, nakiravany na stvareńnie nadziejnaha i sučasnaha servisu z raskładam pryharadnych i mižharodnich aŭtobusaŭ. Dla chutkaha i zručnaha płanavańnia pajezdak i maršrutaŭ.

Naminacyja Gurtam «Prajekt budučyni»

Pieramoh adukacyjny prajekt dla studentaŭ Startup team. Meta prajekta — abjadnać studentaŭ z roznych VNU, dapamahajučy im atrymlivać biascenny vopyt u halinie inavacyjnaha pradprymalnictva. U ramkach prajekta pravodziacca chakatony, kiejs-čempijanaty, ekanamičnyja hulni i inš.

Naminacyja Ufox «Za najlepšuju kamunikacyjnuju stratehiju»

Pieramoh servis dla siamiejnaha ščaścia WeekMenu.by. Servis prapanuje 52 hatovyja tydniovyja mieniu z receptami i śpisami praduktaŭ, nieabchodnymi dla zakupki. Jon dazvalaje kupić adrazu ŭsie pradukty na tydzień za adzin pachod u kramu ci zrabiŭšy adzin zakaz z dastaŭkaj na dom.

Konkurs #Paskareńnie jašče raz dakazaŭ, što nie varta bajacca publična raskazać pra svaju ideju abo prajekt i prapanavać ludziam finansava padtrymać ich praz kraŭdfandynhavuju płatformu.

Клас
0
Панылы сорам
0
Ха-ха
0
Ого
0
Сумна
0
Абуральна
0