U Pałacie pradstaŭnikoŭ i pradpryjemstvie «Minsktrans» nie ličać, što prajaznyja na biełaruskaj movie parušajuć pravy ruskamoŭnych. Heta vynikaje z adkazaŭ, atrymanych na zvarot składalnika raźmieščanaj u internecie pietycyi «Patrabavańnie roŭnaha prava dla ruskamoŭnych». Na hety momant pad pietycyjaj padpisalisia 12 čałaviek.

Jany prosiać «zabiaśpiečyć realnuju roŭnaść dziaržaŭnych moŭ šlacham raźmiaščeńnia infarmacyi na prajaznych dakumientach na abiedźviuch movach». U pietycyi havorycca, što choć bolšaść biełarusaŭ i pryznajuć biełaruskuju movu svajoj rodnaj, pavodle statystyčnych źviestak, hutarkovaj movaj dla absalutnaj bolšaści biełarusaŭ usio ž taki źjaŭlajecca ruskaja.

«Miarkujem, što ŭ transparcie Minska (mahčyma, i ŭ inšych haradach Biełarusi) parušajucca pravy ruskamoŭnych hramadzian Biełarusi. Usie prajaznyja dakumienty — adnarazovyja tałony i šmatrazovyja prajaznyja — majuć nadpisy vyklučna tolki na biełaruskaj movie. Toje ž zasille biełaruskaj movy nazirajecca ŭ čyhunačnym transparcie, a mienavita najmieńnie prypynkaŭ elektryčak i ciahnikoŭ — na biełaruskaj movie kirylicaj i łacinkaj», — adznačaje składalnik pietycyi. Orhanam ułady prapanujecca zabiaśpiečyć realnuju roŭnaść dziaržaŭnych moŭ šlacham raźmiaščeńnia infarmacyi na prajaznych dakumientach na abiedźviuch movach, a taksama ŭnieści źmieny ŭ zakon ab abaronie pravoŭ spažyŭcoŭ.

Adkazy na zvarot atrymanyja z «Minsktransa» i Pałaty pradstaŭnikoŭ. Tak, u adkazie staličnaha transpartnaha pradpryjemstva havorycca, što «prajaznyja kvitki aformlenyja na biełaruskaj movie i ŭ adpaviednaści z zakanadaŭstvam», a «Minsktrans» nie nadzieleny pravam zakanadaŭčaj inicyjatyvy».

U adkazie z Pałaty pradstaŭnikoŭ, padpisanym staršynioj pastajannaj kamisii pa adukacyi, kultury i navucy Iharam Marzalukom, adznačajecca: «Vykarystańnie biełaruskaj movy na transparcie, u tym liku na prajaznych dakumientach, źjaŭlajecca zakonnym, pravamiernym i nie parušaje pravy hramadzian». «Pry hetym uviadzieńnie abaviazkovaha dublavańnia infarmacyi ŭ śfiery transpartnaha absłuhoŭvańnia na dźviuch dziaržaŭnych movach niepaźbiežna vykliča dadatkovyja vydatki dziaržaŭnych orhanaŭ i transpartnych arhanizacyj, što z ulikam najaŭnaj situacyi źjaŭlajecca niemetazhodnym», — ličyć staršynia kamisii.

Niadaŭna ŭ internecie prajšoŭ zbor podpisaŭ pad pietycyjaj ab uniasieńni ŭ zakon «Ab abaronie pravoŭ spažyŭcoŭ» patrabavańnia, kab infarmacyja ab tavarach davodziłasia da nasielnictva nie tolki pa-rusku, ale i pa-biełarusku. Pad pietycyjaj padpisalisia prykładna 4,5 tysiačy čałaviek. Tym nie mienš Ministerstva antymanapolnaha rehulavańnia i handlu dało adkaz inicyjataru hramadskaj kampanii «Spravavodstva pa-biełarusku» Iharu Słučaku, što dla vytvorcaŭ takaja norma «źjaŭlajecca ekanamična nieabhruntavanaj i niavyhadnaj».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?