Nacyjanalny bank Biełarusi pryniaŭ rašeńni ab źnižeńni 15 lutaha staŭki refinansavańnia z 17 da 16% hadavych. Buduć taksama źnižanyja staŭki pa pastajanna dastupnych i dvuchbakovych apieracyjach Nacbanka pa padtrymcy najaŭnaj likvidnaści bankaŭ — z 22 da 20% hadavych.

Jak paviedamlaje pres-słužba hałoŭnaha banka krainy, adpaviednyja rašeńni pryniatyja praŭleńniem i kamitetam pa manietarnaj palitycy Nacbanka 7 lutaha «zychodziačy z najaŭnaj u miežach prahnozu dynamiki rostu spažyvieckich cenaŭ, analizu situacyi na valutnym i depazitnym rynkach, stanu źniešniaha handlu i płaciežnaha bałansu».

Jak adznačajuć u Nacbanku, inflacyjnyja pracesy ŭ krainie praciahvajuć zapavolvacca. Pryrost spažyvieckich cen u śniežni 2016 hoda da śniežnia 2015 hoda skłaŭ 10,6% (pry metavym aryjenciry 12%), u studzieni 2017 hodzie čakajecca na ŭzroŭni 9,6% u hadavym vyražeńni, u lutym—sakaviku — prykładna 9%.

Asnoŭny ŭpłyŭ na strymlivańnie inflacyi praciahvajuć rabić manietarnyja faktary. Pryrost siaredniaj šyrokaj hrašovaj masy ŭ studzieni 2017 hoda da studzienia 2016 hoda skłaŭ 0,3%, što adpaviadaje makraekanamičnym umovam, jakija składvajucca.

Na ŭnutranym valutnym rynku zachoŭvajecca čystaja prapanova zamiežnaj valuty, u asnoŭnym za košt prodažu valuty nasielnictvam. U siehmiencie subjektaŭ haspadarańnia popyt i prapanova valuty zbałansavanyja, što adlustroŭvaje tendencyi ŭ źniešnim handli. U cełym hetyja faktary stvarajuć umovy dla ŭstojlivaści abmiennaha kursu biełaruskaha rubla, padkreślivajuć u Nacbanku.

Na depazitnym rynku zachoŭvajecca pryrost rublovych układaŭ nasielnictva pry pavieličeńni doli novych biezadzyŭnych depazitaŭ u struktury układaŭ.

«Na fonie čakanaha zapavoleńnia inflacyi źnižeńnie staŭki refinansavańnia i stavak pa apieracyjach Nacyjanalnaha banka pa padtrymcy najaŭnaj likvidnaści bankaŭ nie pryviadzie da ich značnaj źmieny ŭ realnym vyražeńni. Heta dazvolić zachavać realnuju dachodnaść bankaŭskich rublovych źbieražeńniaŭ na ŭstojlivym i pryvabnym uzroŭni», — havorycca ŭ paviedamleńni.

Apošni raz staŭka refinansavańnia mianiałasia 18 studzienia, tady jana była źnižanaja z 18 da 17% hadavych. U 2016 hodzie Nacbank źnižaŭ jaje čatyry razy: z 25% u pačatku hoda da 18% u žniŭni.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?