Z momantu praviadzieńnia prezidenckich vybaraŭ u kastryčniku 2015 hoda «nijakich źmienaŭ u drennaj situacyi z pravami čałavieka ŭ Biełarusi nie adbyłosia», havorycca ŭ zajavie śpiecdakładčyka AAN pa Biełarusi Mikłaša Charaści, apublikavanaj na sajcie viarchoŭnaha kamisara AAN pa pravach čałavieka.

«Za apošnija čatyry miesiacy z momantu vybaraŭ nijakich krokaŭ nie było zroblena ŭ Biełarusi dla źmieny represiŭnych zakonaŭ i praktyki ich prymianieńnia, ale źjavilisia vypadki novych parušeńniaŭ pravoŭ čałavieka», — havorycca ŭ zajavie.

Charaści adznačaje, što apošnija vybary, «jak i ŭsie papiarednija, nie adpaviadali demakratyčnym standartam, a dziejny prezident byŭ pieraabrany pry jaŭcy, jakaja nie praviarałasia, i pry nieprazrystym padliku hałasoŭ».

Siarod prykładaŭ parušeńniaŭ pravoŭ čałavieka Charaści nazyvaje toj fakt, što byłyja palitviaźni, vyzvalenyja niezadoŭha da vybaraŭ, da hetaha času nie adnoŭlenyja ŭ hramadzianskich i palityčnych pravach. Nie zakrytaja kryminalnaja sprava ŭ dačynieńni da eks-kandydata na prezidenckich vybarach u 2010 hodzie Alesia Michaleviča. U źniavoleńni znachodzicca aktyvist Michaił Žamčužny (zasnavalnik zakrytaj uładami ŭstanovy «Płatform inaviejšn», što zajmałasia pytańniami parušeńnia pravoŭ ludziej, jakija znachodziacca ŭ miescach pazbaŭleńnia voli).

U jakaści inšych parušeńniaŭ śpiecdakładčyk adznačaje nastupnyja: zabarona na ŭjezd u Biełaruś pravaabaroncy Alenie Tankačovaj; adsutnaść harantyj biaśpieki pry viartańni tych, chto pakinuŭ krainu z-za pryčyny palityčnych pieraśledaŭ; rehularnyja štrafy pradstaŭnikam apazicyi za praviadzieńnie roznych akcyj; kryminalnaja «sprava hraficistaŭ»; źbivańnie ŭ budynku suda karespandenta tut.by Paŭła Dabravolskaha i dvuch aktyvistaŭ Paŭła Siarhieja i Maksima Šycika; admova ŭ rehistracyi šerahu hramadskich abjadnańniaŭ, u tym liku pravaabarončaha centra «Viasna»; štrafy, vyniesienyja žurnalistam-fryłansieram za supracoŭnictva z zamiežnymi ŚMI.

«Spynieńnie hetych parušeńniaŭ pravoŭ čałavieka patrabuje tolki palityčnaj voli ŭ hetaj vielmi centralizavanaj sistemie, — padkreślivaje Charaści. — Ułady pavinny pajści dalej miakkaha padychodu da ciapierašnich represiŭnych praviłaŭ. Uradu Biełarusi nieabchodna pačać maštabnuju reformu zakanadaŭstva dla pryviadzieńnia jaho ŭ adpaviednaść ź mižnarodnymi standartami i abaviazacielstvami ŭ śfiery pravoŭ čałavieka».

Dla palapšeńnia situacyi Charaści rekamienduje spraścić u Biełarusi rehistracyju hramadskich abjadnańniaŭ, praviły praviadzieńnia masavych mierapryjemstvaŭ, skasavać kryminalnuju adkaznaść za dziejnaść ad imia niezarehistravanaj arhanizacyi, uvieści maratoryj na śmiarotnaje pakarańnie, pravieści sumlennyja i adkrytyja parłamienckija vybary.

«Ja pa-raniejšamu hatovy supracoŭničać z uładami. Uzajemadziejańnie uładaŭ z mandatam AAN pa pravach čałavieka stanie krokam, jaki śviedčyć ab hatoŭnaści uładaŭ pracavać nad palapšeńniem situacyi z pravami čałavieka ŭ krainie», — zajaŭlaje Charaści.

Mandat śpiecdakładčyka pa Biełarusi byŭ zasnavany Radaj AAN pa pravach čałavieka ŭ lipieni 2012 hoda i z taho času štohod praciahvaŭsia, adnak biełaruskija ŭłady nie pryznajuć jaho i admaŭlajucca ad supracoŭnictva ź im. Na pasiadžeńni Rady AAN pa pravach čałavieka ŭ mai minułaha hoda pastajanny pradstaŭnik Biełarusi pry AAN u Ženievie Michaił Chvastoŭ zajaviŭ, što najaŭnaść śpiecdakładčyka AAN pa situacyi ŭ Biełarusi na siońniašni dzień «nieadekvatnaja realnaści».

Za ŭsie hetyja hady Mikłaš Charaści tak i nie atrymaŭ mahčymaści naviedać Biełaruś, kab vyvučyć situacyju na miescy i sustrecca z pradstaŭnikami ŭłady. Tym nie mienš jon rehularna rychtuje spravazdačy ab situacyi z pravami čałavieka ŭ Biełarusi, prezientujučy ich Radzie AAN pa pravach čałavieka i Hienieralnaj asamblei AAN.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?