Dzie šukać biełaruski skarb? Jaki na smak Brasłaŭski kraj? Z čym jaduć staražytny Połack? Kolki važyć Radzivił? Naša aŭtarka Jana Šydłoŭskaja znajšła adkazy na hetyja pytańni, pasmakavaŭšy roznyja hatunki biełaruskaha chleba.

1.«Naračanski» («Naročanskij»)

Samy papularny i adzin z samych smačnych biełaruskich chlaboŭ, jakomu sioleta, darečy, spaŭniajecca 30 hadoŭ. Upieršyniu ŭ Miensku hety chleb stali vypiakać u 1986 hodzie partyjami pa 100 bochanaŭ na dzień. Pa «Naračanski» stajali čerhi, niahledziačy na košt u 54 kapiejki — zvyčajny chleb kaštavaŭ 14-18 kapiejek. U chutkim časie hety chleb atrymaŭ mianušku «valutnaha». «Naračanski» piakuć z žytniaj i pšaničnaj muki roznaha hatunku, dadajučy žytni soład, pataku, kmin i bulbianoje piure. Zachoŭvajecca chleb ciaham piaci sutak. Darečy, heta adziny chleb, jaki traplaje ŭ prodaž u roznyja harady Biełarusi. I jaho zavozu admysłova čakajuć. Svaju nazvu chleb atrymaŭ u honar najbujniejšaha voziera Biełarusi — Naračy, na bierazie jakoha ŭ ciopły letni čas adpačyvajuć tysiačy turystaŭ.

.«Naračanski»

2. «Brasłaŭski kraj» («Brasłavskij kraj»)

«Brasłaŭski kraj»

Recept hetaha zavarnoha chleba brasłaŭskija chlebapioki vynachodzili ciaham niekalkich miesiacaŭ. Dla jaho pryhatavańnia ŭžyvajuć suchija jačnuju i soładavuju sumiesi, dadajuć, jak u daŭnija časy, bulbianoje piure, dla vodaru — kmin. U chlebie prysutničajuć vitaminy i adsutničajuć chimičnyja srodki i kanservanty. Ciesta zamiešvajecca ŭ niekalki stadyj i hatovaje dla vypiakańnia praz 12-14 hadzin. U asobnych, śviatočnych i ŭračystych vypadkach, ciomny i smačny «Brasłaŭski kraj» vypiakajuć na klanovych listach. Na etykietcy chleba źmieščany fotazdymak, zrobleny z hary Majak, adkul adkryvajecca vyhlad na aziory Strusta i Snudy. Haru Majak u navakolli Brasłava nazyvajuć samaj pryhožaj ahladalnaj kropkaj krainy. Jaje naviedvańnie ŭznačalvaje śpis rečaŭ must do padčas adpačynku na Brasłaŭščynie.

3. «Staraja Vilnia» («Staraja Vilnia»)

«Staraja Vilnia»

Susiedniaja Litva słavicca chlebam. Da hetyha času ŭ jakaści haścinca ź Vilni viazuć chleb. Biełaruskija chlebapioki śćviardžajuć, što šmat u čym pieraniali dośvied kalehaŭ z Prybałtyki. Zavarny chleb «Staraja Vilnia» vypiečany zhodna sa staražytnym litoŭskim receptam. U jaho składzie — žytniaja siejanaja i pšaničnaja muka pieršaha hatunku, žytni soład, kruchmalnaja pataka, muka jačmiennaja, muka soładavaja absmažanaja, kmin, vada i bulbianoje piure. Hety chleb nastolki smačny, što moža być samadastatkovaj stravaj. Nie psujuć jaho i dadatki ŭ vyhladzie syru, sała i miasa.

4. «Nieścierka» («Niestierka»)

«Nieścierka»

Chleb z takoj nazvaj piakuć u Brasłavie i Viciebsku. U składzie hetaha chleba adsutničajuć droždžy. Ciesta zamiešvajuć z žytniaj i pšaničnaj muki pieršaha hatunku, dla smaku dadajuć pavidła, kmin i sumieś vodarnych prypraŭ. Ceły viciebski chleb važyć dva kilahramy, u prodažy jość i čverć bochana. Smačny i vodarny chleb atrymaŭ imia falklornaha piersanaža Nieścierki. Havarun i viesiałun Nieścierka papularny na Viciebščynie — mienavita śpiektaklem pavodle pjesy dramaturha Vitala Volskaha pad nazvaj «Nieścierka» Viciebski teatr imia Jakuba Kołasa štohod adkryvaje teatralny sezon. Premjera kamedyi adbyłasia ŭ traŭni 1941-ha — i sioleta kołasaŭskamu Nieścierku spaŭniajecca 75 hadoŭ.

5. «Radzivił»

«Radzivił»

Adzin z samych pryhožych i smačnych biełaruskich chlaboŭ. Da taho ž chleb nosić imia arystakratyčnaha rodu, bolšaść pradstaŭnikoŭ jakoha naležali da najbahaciejšych i najznakamiciejšych mahnataŭ Vialikaha kniastva Litoŭskaha. Heta chleb z žytniaj i pšaničnaj muki, jaki ŭtrymlivaje miod i try najmieńni kvasu. «Radzivił», badaj, što samy ciažki z usich biełaruskich chlaboŭ — jon važyć bolš za dva kilahramy. Zatoje i śviežym zastajecca kala dvuch tydniaŭ. Etykietka chleba źmiaščaje rodavy hierb Radziviłaŭ «Truby».

6. «Staražytny Połack»

«Staražytny Połack»

Chleb z takoj nazvaj piakuć u Połacku vosiem hadoŭ. Ciesta zamiešvajuć z žytniaj siejanaj i pšaničnaj muki pieršaha hatunku, a dla smaku i vodaru dadajuć miod i kmin. Na etykietcy chleba vyjava kniazia Ŭsiasłava Bračysłavaviča, albo Čaradzieja, pry jakim Połackaje kniastva dasiahnuła najmacniejšaha roskvitu. Pomnik u honar lehiendarnaj asoby źjaviŭsia ŭ Połacku ŭ 2007 hodzie, praz dva hady paśla vychadu nazvanaj imiem kniazia srebnaj maniety. Chleb «Staražytny Połack» možna znajści ŭ šmatlikich kramach horada, adnak kamuści symbaličnym padasca nabyćcio chleba ŭ Chlebnaj łaŭcy, dzie handlujuć chlebnymi vyrabami ŭžo šmat hadoŭ. Darečy, raźmieščana jana na praspekcie, što nosić imia Franciška Skaryny, jaki, u svaju čarhu, spryčyniŭsia da chlebnaj spravy, źmiaściŭšy ŭ Biblii hraviuru z vyjavaj aśviečanych chlaboŭ na stale. Heta adna z samych staražytnych vyjavaŭ chleba ŭ biełaruskaj kultury.

7. «Alhierd»

Svajo imia hety chleb atrymaŭ u honar kniazia Alhierda. Chlebnaje ciesta zamiešvajuć z žytniaj i pšaničnaj muki. Hatovy chleb utrymlivaje siemki słaniečnika, kunžut, pšaničnaje votrubje i miod. Na etykietcy źmieščana vyjava vialikaha kniazia. Chleb «Alhierd» niezdarma vypiakajuć u Viciebsku, horadzie, jaki kniaź atrymaŭ paśla ŭziaćcia šlubu z dačkoj viciebskaha kniazia Maryjaj. U pieršaj pałovie 14 stahodździa Viciebsk apynuŭsia ŭ składzie Vialikaha kniastva Litoŭskaha, kab adyhrać stratehičnuju rolu va ŭschodniaj palitycy dziaržavy. Časy praŭleńnia Alhierda dla Viciebska stali ŭsploskam jaho ekanamičnaha žyćcia. Letam 2014 hoda horad ušanavaŭ imia dalnabačnaha palityka i vybitnaha pałkavodca — na Rynkavaj płoščy źjaviŭsia konny pomnik kniaziu Alhierdu.

8. «Trajecki»

«Trajecki»

Šmat prychilnikaŭ maje staličny «Trajecki» chleb. Duchmiany, z žytniaj muki i vodarnych specyj, z kramianaj skarynačkaj, jon smačny i pryhožy. Chleb nosić imia Trajeckaha pradmieścia — dobra zachavanaj častki staroha Mienska. Kaliści zabudova paŭvyspy na Śvisłačy była samym vialikim pradmieściem horada. Ciapier jana niaźmienna pryvablivaje turystaŭ. U Trajeckim pradmieści pracujuć kaviarni i restaracyi, dla naviedvańnia adkryty muzei i suvenirnaja łaŭka. «Trajecki» chleb možna nabyć u šmatlikich kramach i, viadoma, u firmovych chlebnych kramach niedaloka ad samoha pradmieścia. Smak i vyhlad chleba nastolki nasyčany i pryciahalny, što, na dumku mienčukoŭ, jaho dehustacyja i vyrab mahli b paspryjać raźvićciu papularnaha na siońnia hastranamičnaha turyzmu.

9. «Biełaruski skarb»

«Biełaruski skarb»

Šukać «Biełaruski skarb» varta ŭ Słonimie — adnym z najstaražytniejšych haradoŭ našaj krainy. Svajho roskvitu horad dasiahnuŭ pad kiraŭnictvam Michała Kazimira Ahinskaha, jaki adkryŭ u Słonimie niekalki pradpryjemstvaŭ, pabudavaŭ kanał, što złučyŭ Jasieldu sa Ščaraj, zasnavaŭ teatr z opernaj, baletnaj i dramatyčnaj trupami. A Słonimskaja kapela ličyłasia adnoj z samych vialikich u Jeŭropie. U słonimskuju rezydencyju dziadźki nia raz pryjaždžaŭ haściavać znakamity Michał Kleafas Ahinski. U historyi Słonima šmat skarbaŭ u vyhladzie lehiend i padańniaŭ, asobaŭ i padziej. Jadomy ž słonimski skarb vypiakajuć vyklučna z žytniaj muki z dadatkam miodu i duchmianych specyj. Čorny «Biełaruski skarb» maje specyfičny, nasyčany smak. Chleb asabliva smačny ŭ troški padsmažanym vyhladzie.

10. «Adviačorak»

«Adviačorak»

Pryhožy i smačny haradzienski chleb: užo nia śvietły, ale jašče i nia čorny. Jon — jak adviačorak. Ciomny. Hety zavarny chleb piakuć z sumiesi žytniaj i pšaničnaj muki druhoha hatunku z dadatkam parašku z kłubniaŭ tapinambura i miodu. Kisła-sałodki smak hetaha chleba pačynaje raskryvacca asabliva ŭ spałučeńni z sałam. Pasprabavać «Adviačorak» varta ŭ adnym z samych starych i pryhožych haradoŭ Biełarusi na bierazie Niomana — Harodni. U raźmieščanym na pamiežžy horadzie možna znajści šmat cikavych nacyjanalnych straŭ i kambinavanych receptaŭ, siarod jakich važkaje miesca zajmajuć supy, jakija, u svaju čarhu, składana jeści biaz chleba.

11. «Darunak Prydźvińnia» («Dar Pridvińja»)

«Darunak Prydźvińnia»

Hety viciebski chleb možna nazvać adnym z samych ciomnych ź biełaruskich chlaboŭ. Dla jaho pryhatavańnia vykarystoŭvajuć niekalki hatunkaŭ žytniaj i pšaničnaj muki, dadajuć siemki słaniečnika i raznastajnyja duchmianyja prypravy. Ciesta vielmi ščylnaje i adnačasova miakkaje i maje jaskravy sałodki smak. Jaho stvaralniki śćviardžajuć, što «Darunak Prydźvińnia» vydatna spałučajecca ź zielaninaj — bazilikam, sałatam, kropam, piatruškaj dy luboj harodninaj — z hurkom, pamidoram, sałodkim piercam. Chleb zachoŭvajecca ciaham čatyroch sutak. U prodaž «Darunak Prydźvińnia» traplaje ŭ naraznym vyhladzie. Nazva chleba symbalizuje miascovaść u vakolicach Dźviny. Na race stajać staražytnyja biełaruskija harady — Połack, Viciebsk, miastečka Druja. Adno sa staražytnych imion raki nosić hatel u Viciebsku — Erydan, numary jakoha ličacca adnymi z samych utulnych u horadzie. U Połacku prachodzić festyval siaredniaviečnaj kultury «Rubon» — jašče adna staraja nazva Dźviny.

12. «Soniečny smak» i «Smačny haściniec»

«Soniečny smak» i «Smačny haściniec»

Chlaby z takimi nazvami pa-biełarusku piakuć u Viciebsku. Z-za niezvyčajnaha składu ich nazyvajuć elitnymi. «Soniečny smak» amal na pałovu składajecca ź siemak słaniečnika, a ciesta zamiešvajuć ź niekalkich vidaŭ žytniaj i pšaničnaj muki pieršaha hatunku. «Smačny haściniec» zvyčajna padajuć u vyhladzie samastojnaj stravy, časta — navat na desiert. Z-za šmatlikich siemak i suchafruktaŭ chleb davoli sałodki. «Smačny haściniec» utrymlivaje funduk, razynki, kurahu, čarnaśliŭ, siemki słaniečnika i harbuza. «Soniečny smak» i «Smačny haściniec» važać 0,25 kh kožny — zvyčajna heta dzieviać nievialičkich kavałkaŭ chleba ŭ vyhladzie trochkutničkaŭ, jakija ŭpryhožać i štodzionny, i śviatočny stoł.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?