Biełaruska, Čałaviek Suśvietu, čałaviek z aktyŭnaj hramadzianskaj pazicyjaj. Mastactvaznaŭca, zasłužany dziejač mastactvaŭ Karelii, siabra Sajuza mastakoŭ Rasii, aŭtar bolš čym 150 artykułaŭ, katałohaŭ, manahrafij. Pierajechali jany ź siastroj Lidzijaj u Śvisłač Puchavickaha rajona ŭ 1989 h. z horada Kirava (Viatki). Viarnulisia na Radzimu paśla 48 hadoŭ vandravańnia.

Ale vierniemsia da pačatku. Naradziłasia Kłaŭdzija Paŭłaŭna 26 śniežnia 1926 u kutočku raju na ziamli — u Rahačovie.

Mama pracavała ŭ haradskoj stałoŭcy kucharkaj i była dla maleńkaj dačuški aniołam — kuplała šmattomnyja knihi pa historyi, vadziła na jalinku ŭ siamju da bolš zamožnaj kalažanki. Tam joj taksama daryli knihi. Dziaŭčynka rasła vialikaj knižnicaj.

Skončyŭšy škołu, pastupiła na histfak BDU. Kali pačałasia vajna, Kłaŭdzija razam sa šmatlikimi biežancami rušyła piechatoj ź Mienska ŭ Rahačoŭ da mamy. I kali pahrukała ŭ dźviery, matka jaje, schudniełuju i zmoranuju, ledź paznała.

Zdabyŭšy niedzie kania, siamja rušyła dalej na ŭschod. Evakujavali ich u Kazachstan. Maci nakiravali pracavać u stałoŭku (što i vyratavała siamju ad hoładu), a studentku-pieršakurśnicu Kłaŭdziju — nastaŭnicaj małodšych kłasaŭ.

Na ŭsio žyćcio Kłaŭdzija zapomniła aportavyja sady kala Karahandy (aport — heta taki duchmiany kazachski jabłyk) i hłybokaje načnoje nieba ź bieźličču zorak.

Paśla vajny siamja nie stała viartacca na papiališča. Lidzija, małodšaja siastra Kłaŭdzii, zastałasia žyć z maci ŭ hlinianaj kazachskaj mazancy. Kłaŭdzija adnaviłasia na druhi kurs histfaka Leninhradskaha ŭniviersiteta.

Kali prymali dakumienty, pahladzieli na jaje i prapanavali fakultet historyi mastactva. Nie pomniačy siabie ad ščaścia, Kłaŭdzija stała zajmacca ŭlubionaj spravaj — vučycca na mastactvaznaŭcu.

Jaje lubimym vykładčykam byŭ Punin — «bliskučy lektar, vybitny mastacki krytyk i tearetyk mastactva, jaki ščyra i bieskampramisna adstojvaŭ kaštoŭnaści mastactva» (sa słoŭ samoj Kłaŭdzii). Jon i skazaŭ, što ŭ «Anisavaj jość voka». Heta była najvyšejšaja acenka.

Paśla zakančeńnia ŭniviersiteta ŭ 1949 h. maładoha śpiecyjalista nakiravali ŭ Viacki mastacki muziej imia Vaśniacovych. Na žal, nie trapiła jana na rodnuju Biełaruś, a stała čarhovym kaštoŭnym kamieńčykam kultury susiedniaj krainy…

Pachavaŭšy ŭ Kazachstanie mamu, da siastry ŭ Kiraŭ pierajechała i siastra Lidzija. Addana pracujučy na nivie rasiejskaj kultury, Kłaŭdzija adčuvała tuhu pa svaim, rodnym, biełaruskim… Budučy pavažanaj u Kiravie, Kłaŭdzija razam ź siastroj usio ž prymajuć rašeńnie viarnucca na Radzimu. Heta 90-ja hady, «novaje nieba nad novaj krainaj». U hetu atmaśfieru i akunułasia z ułaścivaj joj apantanaściu Kłaŭdzija Paŭłaŭna.

Za hod-dva jana pa-novamu avałodała rodnaj movaj. Zaviazała listavańnie, a to i siabroŭstva, z Alesiem Žamojcinym, Michałam Aniempadystavym, Hienadziem Sahanovičam, Hienadziem Šepielevym. Uziała da siabie vučniaŭ sa Śvisłačy. I ŭvieś čas zastavałasia niastomnaj knižnicaj. Apošniaj u jaje rukach była kniha Marcina Chajdehiera «Čas i bytnaść».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?