TBM užo pradstaviła vašaj uvazie dva filmy z cykła «Prava na movu»: «Moŭnyja kursy» i «Mova ŭ carkvie». Ciapier pabačyli śviet jašče dva videaroliki: «Zmahary za movu» i «Da movy praz muzyku».
Sieryja «Prava na movu»
Na jakich kursach najcikaviej vučyć biełaruskuju movu? Ci razmaŭlajuć pa-biełarusku ŭ Carkvie? Jak baroniać svaje moŭnyja pravy ŭ sudzie?
Darahija siabry, na hetyja i šmatlikija inšyja pytańni daje adkaz novy prajekt Tavarystva biełaruskaj movy i Vilenskaj televizijnaj asacyjacyi. Heta sieryja videanarysaŭ pra biełaruskuju movu i moŭnyja pravy ŭ roznych śfierach našaha žyćcia. Dla kahości biełaruskaja mova – heta tolki školny pradmiet. Ale na sam reč heta žyvaja mova mnohich ludziej, jakaja ŭžyvajecca ŭ roznych sacyjalnych instytutach. Na žal, nie zaŭždy možna realizavać svajo prava na karystańnie joj. Ale naša pryhožaja, svojeasablivaja i raźvitaja mova vartaja taho, kab joj karystalisia paŭsiudna. Łozunham našaj sieryi narysaŭ moža być «Usiudy mova!».
Navošta my zrabili hety prajekt i čym jon budzie cikavy Vam? Tavarystva biełaruskaj movy pravodzić manitorynh moŭnaj situacyi ŭ roznych śfierach žyćcia. U hetych narysach my dzielimsia z vami častkaj jaho vynikaŭ. My chacieli zrabić heta nie movaj ličbaŭ, a praz asabistyja čałaviečyja historyi.
Mahčyma, vy paznajecie ŭ hierojach siužetaŭ siabie – a pra siabie hladzieć zaŭždy pryjemna. Mahčyma, nie paznajecie, ale chacieli b raskazać pra movu ŭ śfiery, što blizkaja vam – dasyłajcie svaje kamientary i prapanovy. Mabyć, vy žadali b znajści siabroŭ i adnadumcaŭ – našy siužety dapamohuć. A moža, vy pierakananyja, što dla čałavieka i dla krainy važny najpierš ekanamičny dabrabyt, a mova ŭvohule nie maje značeńnia? My pavažajem usiakaje pierakanańnie, ale pahladzicie hetyja siužety i vy – moža, jany trošku rasšyrać vaš śvietapohlad.
A hałoŭnaje: my spadziajemsia, što, pahladzieŭšy hetyja siužety, vy što-niebudź zrobicie. Naprykład, skažacie kamuści svajo pieršaje «Kali łaska!». A moža, padtrymajecie kampanii TBM. Naprykład, kali my budziem źbirać podpisy za pryniaćcie «Zakona ab dziaržaŭnaj padtrymcy biełaruskaj movy», vy pastavicie i svoj. Zaraz toj samy čas, kali my z vami sapraŭdy možam źmianić situacyju da lepšaha.
Navat kali vy nie razmaŭlajecie pa-biełarusku štodnia, heta mova ŭsio roŭna naležyć vam, jana vaš skarb i vy majecie na jaje prava – zaŭždy i ŭsiudy.