Jeździli z dačkoj Basieńkaj u Maskvu ŭ hości da svajakoŭ. Maja dziciačaja luboŭ da astranomii pryviała ŭ płanietaryj. Padyšli pasłuchać ekskursiju — i prapali. Charyzmatyčnaja tempieramientnaja žančyna tak zachaplalna apaviadała i pra historyju astranomii, i pra aparat «Płanietaryj», i pra asobnyja cikavostki astranamičnaha śvietu (suzorjaŭ na dvuch paŭšarjach zornaha nieba ŭsiaho 88!).

I dzieci, i darosłyja (i maja Basia!) słuchali razinuŭšy raty. U kancy ekskursavoda pravodzili apładysmientami i, što skazać, hatovyja byli zastacca jašče na paru hadzinaŭ.

Ja źviarnuła ŭvahu na proźvišča na bedžy: Natalla Harynia. U hetyja ž dni ja kančała čytać cykł «Astraŭlanka» Nika Harkavaha. Treba skazać, niezvyčajnaja kniha: vielmi navukovaja fantastyka dla padletkaŭ. Pry peŭnych siužetnych słabaściach (jakija padletki jakraz nie zaŭvažajuć) źmiaščaje proćmu źviestak z astranomii, fiziki, bijałohii, sacyjałohii…

Aŭtar Mikałaj Harkavy sam astrafizik, doktar navuk, za dakładnaść navukovych vykładak adkazvaje (u jahonym błohu jość staronka, dzie čytačy znoŭ i znoŭ pytajucca, a časam spračajucca, nakont tych ci inšych epizodaŭ «Astraŭlanki»). Dyk u treciaj častcy ŭ epizodzie sustrełasia hierainia-astranom z takim proźviščam: «Ilja dapamahaŭ naziralniku Natašy z hučnym proźviščam Harynia. Usie zvalijaje za vočy — a časamiŭvočy — Harynyč. A jana, dobraja duša, nie piarečyła».

Viarnuŭšysia ŭ rodny Minsk, dziakujučy biblijatečnamu sajtu livelib.ru ja zajšła na błoh aŭtara i navažyłasia zadać pytańnie, ci vypadkovaść heta. Aŭtar adkazaŭ: «Viadoma, nie. Nataša Harynia, jakaja šmat nazirajeŭ Simieizie, i stała pratatypam hetaj hieraini».

Vielmi pryjemna, kali kniha niečakana ažyvaje. Kali vypadkova sustrakaješsia z knižnymi hierojami. Ale padabienstva nie tolki ŭ proźviščy, taksama i ŭ pafasie aŭtara i ekskursavoda. Vielmi emacyjna Natalla Harynia pytałasia ŭ słuchačoŭ: «Dzie naša budučynia? Dzie nadzieja na našu budučyniu?» i adkazvała «Voś! Voś! Voś!» — pakazvajučy ŭkazkaj na dziaciej, jakija abstupili jaje. Hetaja ž dumka — prapahanda adukacyi maładoha pakaleńnia, układańnie ŭ budučyniu praz układańnie ŭ navučańnie dziaciej — i ŭ «Astraŭlancy».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?