Street Workout, stryt-vork-aŭt — heta vielmi biudžetnaja spartovaja zabava. Z anhielskaj vork-aŭt pierakładajecca jak «vuličnaja treniroŭka», što pieradaje sutnaść hetaj źjavy.
Junaki źbirajucca na supolnyja treniroŭki na adkrytych spartovych placoŭkach dzieści ŭ dvarach spalnych rajonaŭ vialikich haradoŭ, kab, jak jany sami kažuć, «zaniacca fizičnym raźvićciom». Ruch «vorkaŭtaraŭ», ci turnikmenaŭ, paŭstaŭ adnosna niadaŭna. A abjadnańnie jaho adbyłosia nie biez udziełu sacyjalnych sietak (najpierš VK).
Workout — źjava ŭ Biełarusi nakolki novaja, nastolki ž poŭnaja enierhii i pryvabnaści dla mnohich chłopcaŭ i dziaŭčat 14–19 hadoŭ.
Prykładna hetuju ŭzrostavuju katehoryju pradstaŭlała bolšaść naviedvalnikaŭ padziei pad nazovam «Fiestyval zdarovaha ładu žyćcia 2012», što adbyŭsia ŭ Miensku na vychodnych.

Niahledziačy na najaŭnaść va ŭłasnym nazovie ruchu słova «vulica», pakazalnyja vystupy ŭdzielnikaŭ festu adbylisia ŭ zakrytym pamiaškańni hihanckaha spartovaha kompleksu na ŭskrajku Mienska. Časam padzieja nahadvała pakazalny ŭrok fizkultury, a časam — raźniavolenuju tusoŭku adnadumcaŭ z elemientami šou. Muskulistyja chłopcy vykonvali niejkija nierealnyja praktykavańni na zvyčajnych turnikach i brusach, što možna znajści amal u kožnym mikrarajonie.

Brakavała tolki dziaŭčat. Prynamsi, hetym razam vystupić na pierakładzinach navažyłasia tolki adna mienskaja dziaŭčyna Maša Dziamienćjeva.
Ale kamanda Mašy Hard Style Team nie ŭvajšła ŭ lik pieramožcaŭ, u adroźnieńnie ad inšaj mienskaj kamandy z hetkim samym nazovam, što zaniała druhoje miesca ŭ kamandnych spabornictvach.

Vyśvietliłasia, što małady ruch užo maje ŭłasny nabor standartaŭ u praktykavańniach (pasprabujcie, naprykład, u haryzantalnym stanoviščy pavisieć na pierakładzinie z chvilinu). Hetak sama jak i ŭłasnych zorak. Naprykład, pieramožca katehoryi siłavoha frystajła Alaksiej Ściepanienka z Mahilovu ŭžo maje niekalki pieramoh u takich spabornictvach, što tolki pačynajuć źjaŭlajucca ŭ Biełarusi.

Kab treniravacca samastojna, treba niašmat.
Viedy i adnadumcaŭ možna znajści ŭ adpaviednaj hrupie ŭ sacyjalnych sietkach (naprykład, Street Workout Belarus). Turnik i ŭzimku, i letam dastupny ŭ dvary. A dla surjoznych festaŭ moža znajścisia sponsar. U dadzienym vypadku hałoŭnym fundataram zdarovaha ładu žyćcia biełaruskaj moładzi akazałasia Coca-Cola.
Ale hałoŭnaje pry vork-aŭcie nie spabornictvy.
Tut kožny pracuje sam na siabie, na ŭłasnaje cieła, zdolnaści i tryvałaść. Uznaharoda, jak i paśla mnohich inšych spartovych trenirovak, ciažka apisać słovami. Jana źviazanaja z toj ŭnutranaj enierhijaj, što trochu źmianiaje adčuvańnie śvietu i siabie da lepšaha. I, časam, uvaha inšych. Heta taho varta.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?