Першы французскі даведнік па Беларусі выдадзены сумесна з Нацыянальным агенцтвам па турызме.
Аб гэтым карэспандэнту БЕЛТА паведаміў начальнік аддзела маркетынгу і выдавецкай дзейнасці агенцтва Валерый Болдыраў.
Даведнік падрыхтаваны выдавецтвам Petit Futé, які спецыялізуецца на турыстычных кнігах. Кніга выдадзеная на французскай мове накладам у некалькі тысяч асобнікаў
і арыентаваная выключна на франкамоўнага чытача.
Беларусь у даведніку прадстаўленая як цікавы, але невывучаны турыстамі кірунак, што робіць яе яшчэ больш прывабнай. "Французскія аўтары асабліва адзначылі шчодрую беларускую прыроду, прыязны і гасцінны народ, багатую і разнастайную культуру, - распавёў Валерый Болдыраў. - Усё гэта, на іх думку, неабходна ўбачыць уласнымі вачыма, прыехаўшы ў Беларусь".
Акрамя таго, у даведніку апісаныя найбольш цікавыя славутасці краіны, даецца нямала практычнай інфармацыі, змяшчаецца невялікі слоўнік, а таксама прыводзяцца яркія фатаграфіі, якія павінны прыцягнуць увагу французскага турыста.