Шасцёра пацярпелых ад выбуху ў Пінску па-ранейшаму — у стабільна цяжкім стане

Тры з іх знаходзяцца ў Рэспубліканскім апёкавым цэнтры ў Мінску.

Як паведаміў галоўны доктар Гарадской клінічнай бальніцы хуткай медыцынскай дапамогі Віктар Сірэнка, усе яны пераведзены з рэанімацыі ў саматычнае апёкавае аддзяленне.

Яшчэ тры мужчыны знаходзяцца ў рэанімацыі Брэсцкай абласной бальніцы. Як паведаміў намеснік галоўнага доктара па лячэбнай працы бальніцы Тадэвуш Гарасімчык, на сённяшнюю раніцу ўсе яны ў прытомнасці і падключаны да апаратаў штучнай вентыляцыі лёгкіх. «Учора гэтых пацыентаў кансультавала галоўны пазаштатны камбустыёлаг Міністэрства аховы здароўя Вольга Пачапень», — паведаміў Гарасімчык.

***

У выніку выбуху, што здарыўся на заводзе «Пінскдрэў-ДСП» 25 кастрычніка, загінулі 14 чалавек. Целы двух былі знойдзены ратавальнікамі пад заваламі, астатнія памерлі ў бальніцах ад моцных апёкаў.

Паводле звестак МНС, магчымая прычына надзвычайнага здарэння — «выбух адкладанняў драўнянага пылу ў выніку парушэння рэжыму эксплуатацыі абсталявання па вытворчасці драўняна-паліўных гранул».

Па факце выбуху пракуратура Брэсцкай вобласці распачала справу на падставе ч. 2 арт. 302 Крымінальнага кодэкса (парушэнне правілаў вытворча-тэхнічнай дысцыпліны, правілаў бяспекі на выбухованебяспечных прадпрыемствах або ў выбухованебяспечных цэхах або правілаў бяспекі выбухованебяспечных работ).

На ўзроўні Савета бяспекі Беларусі створана камісія па расследаванні прычын надзвычайнага здарэння, якая 15 лістапада павінна паведаміць Савету бяспекі аб выніках расследавання. Апрача таго, уласную камісію па расследаванні прычын трагедыі стварыла кіраўніцтва кампаніі «Пінскдрэў».

3 і 4 лістапада ў Брэсцкай вобласці аб’яўлены днямі смутку па загінулых.

Таццяна Каравянкова, Ларыса Шыганава, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ