Следчым аддзелам папярэдняга расследавання Цэнтральнага РУУС распачата справа на падставе ч. 2 арт. 171 КК (выкарыстанне прастытуцыі ці стварэнне ўмоў для прастытуцыі) у дачыненні да43-гадовай мінчанкі. Аператыўнікі лічаць, што гэтая жанчына кантралявала працу прастытутак, якія прапануюць свае паслугі ў раёне плошчы Перамогі.
Як паведамілі ў аддзеле інфармацыі і грамадскіх сувязяў ГУУС Мінгарвыканкама, затрыманую міліцыянеры ведаюць. У пачатку 2000-х гэтая жанчына прыцягвалася да крымінальнай адказнасці за аналагічнае злачынства. Пасля вяртання з месцаў пазбаўлення волі яна вырашыла наладзіць стары бізнес, улічваючы памылкі мінулага. Аператыўнікі адзначаюць, што сваю дзейнасць сутэнёрша імкнулася весці максімальна заканспіраванымі спосабамі, якія выключаюць магчымасць не толькі затрымання з доказамі злачынства, але і збору доказнай базы ўчынення злачынстваў.
Дзейнічаючы праз правераных трэціх асоб, падазроная паступова, карыстаючыся сваім аўтарытэтам сярод прастытутак, а таксама бравіруючы вопытам знаходжання ў месцах пазбаўлення волі і знаёмствам з крымінальнымі элементамі, здолела пераканаць некаторых прастытутак у тым, што ім неабходна пэўная арганізацыйная падтрымка, у тым ліку і па пытаннях бяспекі. Тых, хто спрабаваў ухіліцца ад «дапамогі», «угаворвала» пагрозамі, запалохвала, пры гэтым упор рабіўся на недапушчальнасць звароту ў органы ўнутраных спраў.
Міліцыянеры гавораць як мінімум аб дзесяці прастытутках, якіх «страхавала» затрыманая, аднак, хутчэй за ўсё, іх было больш.
Пакуль затрыманая абвінавачваецца ў карыслівым выкарыстанні прастытуцыі, але не выключаецца, што ёй выставяць абвінавачанне і ў арганізацыі прытонаў для аказання сексуальных паслуг.
