Udzielniki akcyi salidarnaści ŭ Vilni prasili cudu dla Biełarusi

19.01.2011 / 16:13

19 studzienia pradstaŭniki moładzievych arhanizacyj Litvy praviali ŭ Vilni na Katedralnaj płoščy, la tratuarnaj plitki z nadpisam «Cud» akcyju salidarnaści. Tak moładź nahadała pra padziei 19 śniežnia 2010 hoda ŭ Minsku, kali paśla prezidenckich vybaraŭ ułady žorstka zadušyli mirny pratest prychilnikaŭ demakratyčnych sił i pačali ich masava pieraśledvać.

Pradstaŭniki roznych moładzievych arhanizacyj pračytali zakliki, źviernutyja da litoŭskich i jeŭrapiejskich viedamstvaŭ, ab nieabchodnaści pradprymać kankretnyja dziejańni i dapamahčy biełaruskim apazicyjnym siłam, jakija apynulisia ŭ składanym stanoviščy.

Simvalična kožny zvarot čytali jak žadańnie ź vieraj u toje, što hołas moładzi budzie pačuty, i stanovišča ŭ susiedniaj krainie kali-niebudź źmienicca da lepšaha.

Pavodle słovaŭ adnaho z arhanizataraŭ akcyi, Lutaurasa Hudžynskasa, niadaŭna ŭ Litvie adbylisia mierapryjemstvy z nahody 20-hoddzia baraćby za svabodu Litvy. Hudžynskas skazaŭ, što litoŭcy nie zabylisia pra toje, što značyć hvałt suprać mirnych žycharoŭ, jakija baroniać svaju svabodu, i što značyć narešcie zavajavać hetuju svabodu. «Tamu my pavinny cviorda padtrymać biełaruskich ludziej, jakija zmahajucca za svaje hramadzianskija pravy i dziela hetaha ryzykujuć navat svaim žyćciom. Chto viedaje, być moža, kali-niebudź biełaruskija ludzi ŭbačać sapraŭdny cud», — vykazaŭ nadzieju Hudžynskas.

Vilenčki vierać, što kali ŭstać na plitku «Cud», zahadać žadańnie i try razy paviarnucca, cud zbudziecca.