«Nie ŭsio tak błaha». Što budzie sa studentami-ajcišnikami ŭ EHU biez EPAM
Kolki dzion tamu EPAM raptam zakryŭ prajekt padrychtoŭki ajcišnikaŭ u EHU — pasiarod čarhovaha siemiestra. Studenty dzielacca z devby.io padrabiaznaściami.
24.04.2024 / 10:36
Litoŭski EPAM Sistemos apaviaściŭ kiraŭnictva EHU, što spyniaje partniorstva pa prajekcie EPAM School of Digital Engineering (ESDE). Prajekt byŭ zapuščany ŭ 2022 hodzie i praisnavaŭ mienš za dva hady. Studentam prapanavali praciahnuć navučańnie ŭ EHU na śpiecyjalnaści «Infarmatyka», uziać akademičny adpačynak abo pierajści ŭ inšyja VNU.
ESDE — ekśpierymientalnaje padraździaleńnie EPAM dla padrychtoŭki bakałaŭraŭ i mahistraŭ u partniorstvie z univiersitetami. Naprykład, u Kijevie taki prajekt realizujecca ŭ AUK (Amierykanski ŭniviersitet), u Taškiencie — u IT-Park University (ličbavy ŭniviersitet, stvorany IT-parkam Uźbiekistana sumiesna z EPAM). Na dadzieny momant niama infarmacyi, što inšyja prajekty (ci niejkija ź ich) pad pahrozaj.
U prahramie EHU — try śpiecyjalizacyi na vybar, jakija pahłyblena vyvučajucca na praciahu čatyroch siemiestraŭ: Java EE;.Net; JavaScript/TypeScript. Akramia śpiecyjalizacyi ŭ prahramu ŭklučanyja pradmiety, jakija dapamohuć raźvivać soft skills i atrymlivać praktyčnyja kampietencyi.
Karjernyja mahčymaści paśla zakančeńnia navučańnia:
- Full-stack, Front-end i back-end raspracoŭščyk (śpiecyjalizacyi — Java EE,.Net, JS & TypeScript);
- teściroŭščyk i śpiecyjalist pa zabieśpiačeńni jakaści;
- prajekciroŭščyk prahramnaha zabieśpiačeńnia, UX-dyzajnier, raspracoŭščyk mabilnych prahram;
- mieniedžar IT-prajektaŭ.
Pryčyny ŭ sakrecie
EHU i EPAM nie stali kamientavać, čamu pryniataja takaja pastanova. Studenty, ź jakimi ŭdałosia pahutaryć dev.by, taksama ničoha nie viedajuć pra pryčyny. «Sprabavaŭ daviedacca, ale ni toj, ni druhi bok ničoha nie kaža. Skazali tolki, što ŭ EPAM «kompleksnaja pryčyna».
Kolki studentaŭ vučyłasia na ESDE
Usiaho na prajekcie, pavodle acenak surazmoŭcaŭ, vučycca bolš za 300 čałaviek: na pieršym kursie kala 120 čałaviek (vočnaje + zavočnaje), na druhim kursie kala 200 čałaviek.
Kolki studentaŭ ESDE u vyniku zastaniecca ŭ EHU — nieviadoma.
Reakcyja studentaŭ
Rašeńnie EPAM stała niečakanym dla studentaŭ. Adzin z surazmoŭcaŭ ličyć, što kampanija «pastupiła niepryhoža».
— Niekatoryja ŭspryniali situacyju takim čynam, što EPAM prosta pahulaŭsia sa studentami i kinuŭ. Da hetaha zdaryłasia zatrymka z hrantami na navučańnie, — vykazaŭ mierkavańnie adzin sa studentaŭ.
Pavodle słoŭ surazmoŭcaŭ, bolšaja častka studentaŭ pakul vyrašyła praciahnuć navučańnie. Ale častka źbirajecca ŭ inšyja VNU. Niekatoryja razhladajuć opcyju pierajezdu ŭ Polšču.
— Napeŭna, budu pieravodzicca ŭ inšy ŭniviersitet, mahčyma navat nie ŭ Litvie. Mnie zdajecca, kali źmienicca vykładčycki skład i źmienicca prahrama, budzie nie taja jakaść adukacyi, — padzialiłasia płanami adna sa studentak.
Košt ESDE jak plus
Adna z alternatyŭ EPAM School of Digital Engineering (ESDE) u Litvie — Vilnius Tech (Vilenski techničny ŭniviersitet). Ale studenty aścierahajucca składanaściaŭ praz roźnicu ŭ sistemie acenki viedaŭ, da taho ž košt navučańnia ŭ Vilnius Tech «minimum u dva razy bolšy».
Asablivaść vučoby ŭ EHU pa prahramie EPAM School of Digital Engineering u tym, što płata dla studentaŭ — fiksavanaja na ŭvieś termin navučańnia, nie pierahladajecca štohod dla tych, chto ŭžo pastupiŭ, kažuć studenty.
Naprykład, dla studentaŭ, jakija pačali navučańnie na prajekcie ŭ 2022 hodzie, płata na praciahu ŭsiaho terminu navučańnia (3,5-4,5 hady) składaje 1600 jeŭra (vočnaje navučańnie) i 1100 jeŭra (zavočnaje) na siemiestr. Tyja, chto pastupiŭ u 2023 hodzie, płaciać 1760 jeŭra (vočnaje navučańnie) i 1210 jeŭra (zavočnaje). Dla tych, chto pastupaje sioleta košt vočnaha navučańnia składzie 1800 jeŭra, zavočnaha — 1250 jeŭra na siemiestr.
Byli jašče i hranty EPAM (ale jość niuansy)
Jašče adna asablivaść prajekta — hranty na navučańnie ad EPAM. Ich raźmiarkoŭvali pa paśpiachovaści, raskazvajuć studenty. «Najlepšyja 10% studentaŭ atrymlivali 100% hrant (źnižku na navučańnie na siemiestr), nastupnyja za imi 15% atrymlivali 50% hrant».
Što praŭda, pavodle słoŭ studentaŭ, infarmacyi pra hranty na biahučy siemiestr (pa vynikach papiaredniaha) dahetul niama.
Na dumku adnaho z surazmoŭcaŭ, u sychodzie EPAM navat źjaŭlajucca svaje plusy, kali kazać pra hranty.
— Studenty infarmatyki nie mahli ŭdzielničać u mnohich inicyjatyvach EHU. Naprykład, atrymlivać hranty na prajekty abo stypiendyi za daśledčuju dziejnaść abo vydatnuju vučobu. Z sychodam EPAM mahčymaściaŭ stanie bolš.
Stažyroŭki ciapier — na ahulnych padstavach
Pavodle słoŭ adnaho sa studentaŭ, «pieršapačatkova mierkavałasia, što stažyroŭki mohuć być u EPAM abo ŭ inšych kampanijach pa žadańni. Ciapier harantavanyja stažyroŭki ŭ EPAM skasavali. Ale možna padavacca na stažyroŭku ŭ kampaniju na ahulnych padstavach».
Subjektyŭnyja plusy i minusy
Paprasili studentaŭ abahulnić uražańni ad prahramy.
Plusy:
- «Hnutki farmat, zvyčajna nie bolš za 2-3 pary na dzień, možna sumiaščać z pracaj».
- «Praktykaaryjentavanaść, niama ton vyšejšaj matematyki, usio ŭ mieru».
- «Pastajannyja iventy ad ofisa infarmatyki (viečary nastolnych hulniaŭ, kinakłuby, speaking clubs)».
- «Pryjemnyja vykładčyki z pradakšan-dośviedam i «słupy» ajci-industryi ŭ Biełarusi».
- «Jość anłajn-kłasy, usie zaniatki prachodziać pa zumie ź luboha punkta śvietu. U inšych univiersitetach takoha niama».
- «Jość dobryja aŭtarskija kursy».
Minusy:
- «Niedachopy arhanizacyi. Naprykład, pary mohuć pieranieści biez papiaredžańnia».
- «Nizki prachadny bał niekalki źnižaje siaredniuju paśpiachovaść i matyvavanaść hrup. Na pieršym kursie poŭna maładzionaŭ ź siarednim bałam 7 i z bałami pa CT mienšymi za 60. Mnohija naohuł nie razumiejuć, što jany tut robiać».
- «Niama padziełu na vučniaŭ ź viedami i biez. Pa vyniku pakutujuć i adnyja, i druhija».
- «Jość vielmi syryja prahramy, takija jak Digital Technologies. U pieršym siemiestry łabaratornyja raboty treba rabić u Excel i nijak inakš, heta ŭžo stała ŭnutranym miemam».
- «Niekatoryja pradmiety — heta biaspłatnyja anłajn-kursy z dadatkovymi chatnimi zadańniami».
Što budzie dalej
Kiraŭnictva ŭniviersiteta prapanavała studentam praciahnuć navučańnie ŭ EHU na śpiecyjalnaści «Infarmatyka» ŭ novym rearhanizavanym filijale — School of Digital Competences. Pry hetym kiraŭnictva EHU śćviardžaje, što rearhanizacyja nie zakranie navučalnaha pracesu: nijakich kardynalnych pieramien nie budzie.
Taksama studentam paviedamili, što bolšaść vykładčykaŭ, jakija byli zadziejničanyja ŭ prajekcie EPAM, zastanucca ŭ EHU.
— Častka vykładčykaŭ užo daŭno nie pracuje ŭ EPAM i tamu sychod kampanii z prajekta nie maje na ich paŭpłyvać. Kali što, skazali, buduć šukać zamienu. Dadaducca supracoŭniki inšych kampanij. Da kanca siemiestra, zdajecca, nijakich źmien u vykładčyckim składzie nie pradbačycca, — raskazaŭ adzin z surazmoŭcaŭ.
Jašče adzin surazmoŭca źviarnuŭ uvahu na toje, što brend EPAM u naźvie prajekta byŭ dobrym pradavalnym faktaram. Z sychodam kampanii «ŭron byŭ naniesieny pa markietynhavym składniku».
— Ale ja dumaju, što škoła znojdzie niejki novy tuz u rukavie, jaki zacikavić abituryjentaŭ i budučych studentaŭ.
Pavodle słoŭ surazmoŭcy, u sychodzie EPAM z prajekta ŭ EHU jość i svaje plusy.
— U nas źjaviłasia bolš svabody, źniatyja mnohija karparatyŭnyja abmiežavańni. Naprykład, my zmožam pryciahvać bolš inviestycyj u škołu, aktyŭniej vieści markietynh, a taksama zaprašać vykładčykaŭ nie tolki z EPAM. Raniej heta było mahčyma, ale mnohija vykładčyki, jakija pracujuć u kampanijach-kankurentach EPAM, turbavalisia, što ich načalstva moža nie zrazumieć takich suviaziaŭ. Ciapier hetaja prablema źniataja.
Zahinuŭ supracoŭnik EHU Vadzim Chlebarodaŭ, jamu było 36 hadoŭ
Rektar EHU prakamientavaŭ infarmacyju pra mahčymaje pryznańnie ŭniviersiteta «ekstremisckim»
Jak EHU žyvie ŭ atmaśfiery pahrozy i niapeŭnaści