Vyjšaŭ biełaruski sieryjał «Pracesy». Raskazvajem, što čakać
«Biełsat» vykłaŭ na jutub pieršuju sieryju svajho novaha sieryjała ad Andreja Kašpierskaha i Michasia Zuja ŭ žanry absurdysckaj trahikamiedyi, jakaja raspaviadaje pra pracesy ŭ Biełarusi i pa-za joj. Zaśmiajacca budzie składana.
27.11.2023 / 17:17
Scena, ź jakoj pačynajecca sieryja. Kadr ź sieryjała
Sieryja pačynajecca i zakančvajecca absurdnymi pahoniami za pratestoŭcami, ale ŭ łapy «pravasudździa» traplajuć i vypadkovyja ludzi, jak to nieabyjakavaja babula ŭ čyrvona-zialonym kaściumie, jakaja pramaŭlaje znajomyja «tak i treba, fašystam hetym», i dzied, jaki ŭ słuchaŭkach prosta vybivaje svoj dyvan. A ŭ siaredzinie sieryi pakujuć jašče i ślapoha ź bieła-čyrvona-biełym kijočkam. Sud raźbiarecca!
Praź niedachop miescaŭ u turmach kiraŭnictva zahadvaje amapaŭcu, jakoha hulaje akcior Andrej Novik, zabrać zatrymanych na akcyi pratestoŭcaŭ da siabie dadomu na 15 sutak.
Zatrymańnie ślapoha z kijočkam pa «schiemie bčb». Kadr ź sieryjała
Dom siłavika ci Akreścina? Roźnica nievialikaja. Kadr ź sieryjała
Padjezd doma, dzie žyvie amapaviec, da boli nahadvaje kalidory izalatary — tyja ž malavanyja alejnaj kazionnaj farbaj ścieny, tyja ž kraty na leśvicy. Doma paradki nie lepšyja. Razmovy pamiž sužencami zvodziacca da dźviuch fraz«Kocik?» i «Ja ch**iu», jakim žonka vykazvaje ŭsiu hłybiniu svajho abureńnia źjaŭleńniem niečakanych haściej u domie.
Jak kažuć, za kožnym vialikim mužčynam staić vialikaja žančyna. U siamji amapaŭca jana staić chutčej nad im. Jaje rolu vykonvaje kupałaŭka Valancina Harcujeva. Vinavaty ŭ dyskamforcie žonki siłavik sam unačy adbyvaje pakarańnie na padłozie z uklučanym śviatłom.
Amapaviec prynosić telefon z «pravasudździem» u «kamieru». Kadr ź sieryjała
Da absurdu daviedziena i pravasudździe. Sudździa ŭžo pravodzić nie prosta anłajn-pasiadžeńnie, ale viadzie jaho naŭprost z ułasnaj kuchni, papivajučy harbatu i zamacoŭvajučy prysud 15 sutak udaram małatočka dla miasa.
Siamja adpačyvaje, pakul u vannym pakoi čynicca hvałt. Kadr ź sieryjała
Troje asudžanych pradstaŭlajuć abahulnienyja typažy biełaruskamoŭnaha zmahara, rolu jakoha vykonvaje paet i muzykant Vital Ryžkoŭ, panka, jakoha syhraŭ lidar hurta Relikt Alaksandr Dziemidzienka, dy ajcišnika ŭ vykańni fatohrafa Hleba Burnašava. Dla ich pakoj dziaciej amapaŭca pieraŭtvarajecca ŭ kamieru, vanny pakoj — u miesca dopytaŭ.
Umovy ŭ impravizavanaj kamiery ŭ paraŭnańni z Akreścina nasamreč kazačnyja: adčyniajucca vokny, narmalny tualet, usiaho try čałavieki na pakoj, nichto nie šmanaje, ciopłaja padłoha, niama kłapoŭ, šmat rečaŭ, niachaj i dziciačych, jakimi možna siabie zaniać, na maleńkich łožkach biez paścieli kudy miahčej spać, čym na mietaličnych «hrylach», i navat na vulicu vyvodziać na prahułku. «Kab ja tak siadzieŭ», padumajuć mnohija, chto prajšoŭ praź inšy dośvied.
Dzieciam cikaviej ź viaźniami, čym z baćkami. Kadr ź sieryjała
Žonka, jak sapraŭdnaja haspadynia, chutka znachodzić praktyčnuju karyść ad aryštantaŭ. Jany prybirajuć, myjuć posud, čyściać bulbu, dahladajuć dziaciej, rašajuć ź imi damašnija zadańni i hulajuć u moŭnyja hulni.
Chronamietražu sieryi mała dla taho, kab raskryć piersanažaŭ, ichnija pamknieńni, stanovišča ŭ siamji dziaciej, jakija znachodziać siarod aryštantaŭ siabroŭ, dy j postaci samich aryštantaŭ, jakija čamuści ŭvieś čas, kali nie kryčać ad bolu, zastajucca niepraŭdapadobna niamymi. My daviedvajemsia pra ichnija roli tolki z apisańnia. Usio namiečana štrychavymi linijami.
Ciažka niešta skazać i pra hulniu akcioraŭ, jaje tut vielmi mała — akcioram prosta niama dzie i niama kali siabie prajavić.
Hvałt my čujem, ale prama nie bačym. Kadr ź sieryjała
Hvałt u sieryjale pakazany naturalistyčna. U vypadku ź viaźniami, jakich karajuć za sprobu źbiehčy, za niapravilna vyrašanuju zadaču pa matematycy i za abdymki dziaciej, u čyim pakoi ich pasialili, my nie bačym hvałt prama, usio adbyvajecca za začynienymi dźviaryma, ale my vydatna čujem udary i stohny, bačym ruchi za škłom.
Vialikaja kolkaść biełarusaŭ u apošnija hady byli śviedkami hvałtu tak zvanych «siłavikoŭ» abo stali jahonymi achviarami. I hety bol jašče nie zažyŭ, kožny dzień takomu hvałtu padviarhajucca ŭsio novyja i novyja biełarusy. Hetyja sceny nie dajuć zaśmiajacca ad absurdu situacyi, bo abudžajuć tryvohu i vycisnutyja ŭspaminy.
Bol i hvałt čaściakom vyklikajuć akramia žachu jašče i śmiech. Niekatoryja psichołahi ličać, što žach i humar u asnovie svajoj majuć adny i tyja ž fienomieny: nieadpaviednaść i parušeńnie normaŭ. Ale ŭ takoj čullivaj, mahčyma, temie varta być bolš dalikatnym.
Siłavik na pravierku nie taki i mocny. Kadr ź sieryjała
Bieły šum u hałavie siłavika zamianiajuć nastaŭleńni žonki. Kadr ź sieryjała
U kancy tema pryhonu atrymlivaje raźvićcio. Haspadarlivaja žonka zakazvaje baćkami na daču pabolej mocnych aryštantaŭ — treba kapać aharod.
U hety čas mužny amapaviec pieratvarajecca ŭ dzicio, jakomu litaralna na vucha šepča djabalica-žonka. Šepča pierakaz rasijskaha telebačańnia, što pratestoŭcy — heta naščadki pryhonnych i «ŭzbuchajuć jany tamu, što im na hienietyčnym uzroŭni nie chapaje, kab ich p****ili jak raniej, a pa zakonie pryrody jany musiać pracavać i nie vy**vacca».
Na ščaście dla siońniašnich aryštantaŭ, paśla 15 sutak im addajuć telefony i vypuskajuć na volu.
Scenka z haradskoha žyćcia ŭ Biełarusi. (Spojler: Dzieda zabiaruć). Kadr ź sieryjała
Nastupnyja sieryi, «Patryjatyčnaje praktykavańnie» i «Pryśniłasia», vidać, buduć raźvivać inšyja absurdnyja «pracesy», što adbyvajucca ŭ krainie, a nie historyju siamji amapaŭca.
Novyja sieryi pakul niedastupnyja da prahladu, ale ŭžo byli pakazanyja na fiestyvali «Bulbamuvi-2023», atrymaŭšy stanoŭčyja recenzii ad kinaahladalnikaŭ. Kinakrytyk Taras Tarnalicki, naprykład, napisaŭ, što «tak pavinna vyhladać biełaruskaje hulniavoje kino zdarovaha čałavieka».
Sapraŭdy, moža nastupnyja sieryi i atrymalisia vydatnymi, ale pieršaja sieryja nie pakidaje pazityŭnaha ŭražańnia. Varta było b vykładać adrazu niekalki epizodaŭ, kab hladač uciahnuŭsia ŭ hetuju antałohiju biełaruskaj rečaisnaści.
Čytajcie taksama: