Вядоўца «Салаўёў Live» назваў прэс-сакратара МЗС Расіі «шмарай, якая шмат выпівае». Салаўёву прыйшлося выбачацца
Яўген Сатаноўскі вёў на «Салаўёў Live» аўтарскую перадачу «Армагедоныч». Яго прадстаўлялі як эксперта па ізраільскай і блізкаўсходняй палітыцы, піша «Медуза».
21.10.2023 / 12:08
Марыя Захарава. Фота: Contributor / Getty Images
17 кастрычніка на ютуб-канале журналіста Аляксандра Вальдмана выйшла інтэрв'ю Сатаноўскага, у якім ён, у прыватнасці, заявіў, што «намеснік міністра замежных спраў Міхаіл Багданаў бухаў як не ў сябе».
Пра афіцыйнага прадстаўніка МЗС РФ Марыю Захараву Сатаноўскі сказаў, што яна «ў прынцыпе габрэяў не асабліва любіць, а Ізраіль трываць не можа і асабліва гэта не хавае» і назваў яе шмарай, якая «моцна выпівае».
Гэты фрагмент інтэрв'ю Сатаноўскага распаўсюдзіўся ў сацсетках. Сёння ў тэлеграм-канале Уладзіміра Салаўёва з'явілася відэа, на якім ён, стоячы ў камуфляжы, выбачаецца перад Захаравай і Багданавым і абвяшчае пра звальненне вядоўцы:
«Я хацеў бы прынесці свае прабачэнні МЗС РФ і надзвычайным і паўнамоцным паслам спадару Багданаву і спадарыні Захаравай за абсалютна несправядлівае па змесце і недапушчальнае па форме выказванне, дапушчанае супрацоўнікам нашага канала Яўгенам Янавічам Сатаноўскім.
Яўген Янавіч Сатаноўскі некалькі дзён таму ў гутарцы з ізраільскім журналістам на яго ютуб-канале, каментуючы сітуацыю на Блізкім Усходзе, абразіў як гэтых паважаных дыпламатаў, так і Міністэрства замежных спраў, у выніку чаго я не бачу магчымасці працягваць прафесійныя дачыненні з Яўгенам Янавічам і прыняў рашэнне аб звальненні Сатаноўскага з нашага канала».