«Белпол»: У Віктара Бабарыкі — збоі ў сэрцы
Арганізацыя былых сілавікоў «Белпол» даведалася, што Віктар Бабарыка, які адбывае пакаранне ў наваполацкай калоніі, мае праблемы са здароўем.
13.10.2023 / 16:34
Віктар Бабарыка. Май 2020 года. 18 чэрвеня 2020 года ён быў затрыманы разам з сынам, а праз год асуджаны на 14 гадоў калоніі. Фота: «Наша Ніва»
«Віктар Бабарыка па-ранейшаму ізаляваны ад іншых зняволеных і ўтрымліваецца адзін у памяшканні камернага тыпу (ПКТ) ВК № 1 у Наваполацку, мае праблемы са здароўем — збоі ў працы сэрца», — паведамляе «Белпол».
Таксама яны зазначаюць, што ў канцы красавіка Віктар Бабарыка быў змешчаны ў бальніцу.
«Сур'ёзныя цялесныя пашкоджанні былі нанесеныя Віктару Бабарыку прадстаўнікамі карных структур, якія не адносяцца да персаналу калоніі і спецыяльна прыязджалі ў ПК-1 для правядзення «прафілактычнай гутаркі», якая перарасла ў жорсткую акцыю застрашвання», — сцвярджае «Белпол».
Нагадаем, што пра экс-кіраўніка Белгазпрамбанка нічога не вядома амаль паўгода, з 25 красавіка.