У Літве знайшлі выкрадзеных два тыдні таму дзяцей. Іх хацелі вывезці ў Беларусь
18 ліпеня ў Літве з Каўнаскага дома апекі Pastogė прапалі трое дзяцей. Падазравалася, што дзяцей 5, 7 і 9 гадоў выкралі іх бацькі. Выкрадзеных дзяцей суд пастанавіў забраць з сям'і ў маі 2023 года за тое, што дзеці не наведвалі школу і дзіцячы садок, бацькі не стваралі ўмовы для сацыялізацыі дзяцей і заяўлялі, што літоўскія законы ім не ўказ. Цяпер гэтых дзяцей знайшлі і падобна на тое, што іх хацелі вывезці ў Беларусь, піша Delfi.lt.
01.08.2023 / 23:09
Прадстаўнік Дэпартамента паліцыі Літвы афіцыйна паведаміў, што выкрадзеныя некалькі тыдняў таму ў Каўнасе малалетнія дзеці былі знойдзеныя.
Паліцыя паведамляе, што сям'я была затрыманая сёння ў 12.50 зусім блізка ад мяжы з Беларуссю. Мужчына, які кіраваў аўтамабілем Ford Focus, прад'явіў памежнікам нямецкія дакументы, гаварыў па-нямецку, а калі памежнікі сталі вывучаць дакументы, спрабаваў з'ехаць.
«Затрыманыя прад'явілі фальшывыя дакументы. Яны затрыманыя за 1 км ад мяжы з Беларуссю, мяркуецца, што яны планавалі нелегальна перайсці мяжу», — заявіла паліцыя.
Пракурор Дарус Валкавічус сказаў, што цяпер расследуюць выкраданне дзяцей. Паводле яго слоў, цалкам магчыма, што сям'я планавала нелегальна перасячы мяжу з Беларуссю ў Ігналінскім раёне. Ёсць версія, што яны маглі прасіць прытулку ў Беларусі.
За выкраданне дзяцей бацькам пагражае штраф, абмежаванне волі, арышт або пазбаўленне волі на тэрмін да двух гадоў.
Выкрадзеных дзяцей суд пастанавіў забраць з сям'і ў маі 2023 года за тое, што дзеці не наведвалі школу і дзіцячы сад, бацькі не стваралі ўмовы для сацыялізацыі дзяцей, самі бацькі заявілі, што літоўскія законы ім не ўказ.
Бацька дзяцей заявіў, што з'яўляецца прадстаўніком руху суверэнных грамадзян. Людзі, якія з'яўляюцца прыхільнікамі гэтага руху, не прызнаюць прававую сістэму і дзяржаву, заяўляюць, што з'яўляюцца прыватнымі кампаніямі, якія нікому не належаць.
Пра небяспеку гэтага руху летась папярэджваў Дэпартамент дзяржбяспекі пасля таго, як у Германіі былі затрыманыя 25 чальцоў гэтага руху, якія планавалі атаку супраць парламента краіны. Паведамлялася, што людзі, якія абвясцілі сябе «суверэнамі», вераць, што абмежаванні, якія дзейнічаюць у дзяржаве, на іх не распаўсюджваюцца.
«Некалькі дзясяткаў суверэнаў, якія лічаць сябе грамадзянамі СССР або ЛССР, актыўна дзейнічаюць і ў Літве. Некаторыя з іх публічна заяўляюць пра сваю настальгію па савецкім часе, пра павагу да помнікаў савецкім вайскоўцам, раней яны супрацоўнічалі з пракрамлёўскімі прапагандыстамі ў Літве, ездзілі ў Беларусь «паляпшаць» двухбаковыя адносіны і станоўча ацэньвалі рэжым гэтай краіны», — паведамляў Дэпартамент.