«Трэніроўкі на мяжы — паказальная акцыя, каб мы гэта каментавалі». Літоўскі парламентарый лічыць, што з-за вагнераўцаў не трэба мітусіцца
Старшыня Камітэта літоўскгаа Сейма па нацыянальнай бяспецы і абароне Лаўрынас Каcчунас выказаўся пра вайсковыя вучэнні наймітаў ПВК «Вагнер» разам з беларускай арміяй паблізу польскай мяжы, пра якія стала вядома ўчора. Паводле яго, гэта для заходніх суседзяў хутчэй не непасрэдная пагроза, а паказальная акцыя з мэтай правакацыі.
21.07.2023 / 21:07
Лаўрынас Касчунас. Скрыншот з відэа
«Фактар рызыкі прысутнічае, сітуацыя пагоршылася з-за размяшчэння ў Беларусі, але гэтыя людзі з іх цяперашнім баявым патэнцыялам рэальнай ваеннай пагрозы не ўяўляюць», — сказаў Лаўрынас Каcчунас агенцтву ELTA.
«Давайце захоўваць годнасць і самапавагу. Гаворка ідзе пра злёт 1-2 тыс. лёгкаўзброеных байцоў, якія цяпер нібыта кагосьці вучаць: ці імітуюць навучанне, ці сапраўды вучаць. Несумненна, іх перамяшчэнне, відэазапісы, якія яны загружаюць, у нейкай ступені ўплываюць на інфармацыйнае поле, але гэта — лёгкаўзброеныя людзі», — таксама адзначыў ён.
«Тыя трэніроўкі, якія больш нагадваюць нейкую паказальную акцыю, мне здаецца, гэта больш правакаванне нас усіх, каб нам даводзілася кожны раз каментаваць тое, што там адбываецца», — адзначыў парламентарый.
Адпаведна старшыня парламенцкай камісіі не лічыць, што ў адказ на размяшчэнне ў Беларусі наймітаў «Вагнера» Літва павінна сцягваць вайскоўцаў да мяжы ці прымаць іншыя ўзмоцненыя меры. Паводле яго, найлепшым адказам было б узмацненне прысутнасці саюзнікаў па НАТА на ўсходнім флангу Альянсу.
Чытайце таксама:
У Беларусі можа апынуцца да 10 тысяч вагнераўцаў — начштаба
ПВК «Вагнер» пасля бунту распускае ўсіх былых зняволеных па дамах — «Важные истории»