Hałoŭnakamandujučy armii ZŠA zajaviŭ pra pieršyja pośpiechi ŭkrainskaha kontrnastupleńnia
Ukraina pastupova damahajecca pośpiechu ŭ kontrnastupleńni, pra heta zajaviŭ staršynia Abjadnanaha kamiteta načalnikaŭ štaboŭ hienierał Mark Mili. Adnak pry hetym jon dadaje, što straty USU, imavierna, buduć vysokimi.
15.06.2023 / 20:24
Mark Mili. Fota: AP Photo/Virginia Mayo
«Ukraina pačała nastupać — i jany pastupova ruchajucca napierad. Heta vielmi ciažkaja bitva. Jana vielmi žorstkaja, i na jaje patrebny značny čas, a košt budzie vysokim», — zajaviŭ hienierał u kamientary Reuters.
Mili padkreśliŭ, što ŭkrainskaje vojska vałodaje vysakajakasnymi aficerami i vysokim maralnym ducham, čaho nielha skazać pra rasijskaje.
«Ich lidary nie zaŭsiody dziejničajuć uzhodniena, maralny duch ich vojskaŭ nievysoki, i jany siadziać na abarončych pazicyjach. Mnohija ź ich navat nie razumiejuć, čamu jany tam apynulisia», — skazaŭ amierykanski vojenačalnik.
Mark Mili biare ŭdzieł u naradzie ministraŭ abarony krain NATA, na jakuju prybudzie taksama kiraŭnik Minabarony Ukrainy Alaksiej Reźnikaŭ.
Čytajcie taksama:
Na Zachadzie paćviardžajuć pośpiechi kontrnastupleńnia Ukrainy i prahnazujuć dalejšy prahres
Vialikabrytanija, Danija, Niderłandy i ZŠA sumiesna daduć Ukrainie sotni rakiet dla SPA
Ukrainskija vajskoŭcy pakazali kadry z vyzvalenaj Makaraŭki ŭ Danieckaj vobłaści