Afrykanskija krainy prapanujuć Ukrainie i Rasii śpis umovaŭ dla pieramoŭ. Tam zhadvajecca i Biełaruś
Ahienctva Reuters atrymała dostup da niepubličnaha śpisa papiarednich umovaŭ, jaki delehacyja afrykanskich krain skora źbirajecca pakazać prezidentam Ukrainy i Rasii «dla ŭmacavańnia davieru pamiž imi». Adna z klučavych umovaŭ tyčycca rasijskaj jadziernaj zbroi ŭ Biełarusi.
15.06.2023 / 22:06
Fota: AP
Delehacyja afrykanskich krain, u skład jakoj uvojduć lidary Paŭdniovaj Afryki, Sieniehała, Zambii, Kamorskich astravoŭ i premjer-ministr Jehipta, źbirajecca ŭ najbližejšyja dni naviedać Kijeŭ i Sankt-Pieciarburh dla prapanovy śpisa «mier pa ŭmacavańni davieru» pamiž Ukrainaj i Rasijaj dla ablahčeńnia nastupnych mirnych pieramoŭ pa spynieńni vajny.
Jak piša ahienctva Reuters, jakoje aznajomiłasia sa śpisam, hetyja papiarednija miery ŭjaŭlajuć saboj nastupnyja kroki:
- Vyvaz rasijskaj taktyčnaj jadziernaj zbroi ź Biełarusi.
- Vyvad rasijskich vojskaŭ z terytoryi Ukrainy (nie kankretyzujecca, ci z usioj terytoryi albo tolki z častki).
- Źniaccie ordara na aryšt Uładzimira Pucina, jaki byŭ raniej inicyjavany Mižnarodnym kryminalnym sudom za vajennyja złačynstvy i złačynstvy suprać čałaviečnaści.
- Admiena sankcyj suprać Rasii (znoŭ ža nie ŭdakładniajecca, ci idzie havorka pra poŭnaje źniaccie sankcyj albo tolki pra častkovaje).
- Biezadmoŭnaje i bieśpierabojnaje pahadnieńnie pa zbožžy i ŭhnajeńniach pamiž Ukrainaj i Rasijaj.
«Vyšejzhadanyja miery pavinny być skiravanyja na stvareńnie ŭmovaŭ, jakija buduć sadziejničać spynieńniu ahniu i ŭmacavańniu davieru pamiž bakami kanfliktu dla raspracoŭki stratehij adnaŭleńnia miru va Ukrainie», — havorycca ŭ dakumiencie sa śpisam mier ad afrykanskaj delehacyi, jaki pakažuć prezidentam Ukrainy i Rasii.
Nahadajem, što niadaŭna lidary afrykanskich krain anansavali svoj pryjezd va Ukrainu i Rasiju dla raspracoŭki darožnaj karty spynieńnia vajny, jakaja stavić pad udar charčovuju biaśpieku Afryki praz parušeńnie łancužkoŭ pastavak zbožža i ŭhnajeńniaŭ.
Čytajcie taksama:
Zialenski prapanuje Rasii «dypłamatyčny vychad» z najmienšymi stratami
Mižnarodny kryminalny sud pačaŭ rasśledavać padryŭ Kachoŭskaj HES
Džo Bajden pradoŭžyŭ jašče na adzin hod sankcyi suprać Biełarusi