Шматпакутны парк Чавэса ў Мінску канчаткова рэканструююць. Вось як ён зменіцца
Там з'явяцца венесуэльскія матывы — як мінімум у брукаванні пляцоўкі для масавых мерапрыемстваў.
07.06.2023 / 12:55
Фота: Мінбуд
У сталічным парку Уга Чавэса ідзе рэканструкцыя — ужо трэцяя чарга. Ён зайграе новымі фарбамі. Прычым, як у прамым, так і пераносным сэнсе, піша Tochka.by.
Трэцяя чарга рэканструкцыі парку па аб'ёмах самая маштабная, распавёў прараб філіяла ПМК-1 ААТ «Будтрэст № 35» Артур Ваяводскі. У парадак прыводзяць велізарную тэрыторыю ў межах вуліц Нёманская, Лідская, Калеснікава і Казіміраўская.
«Цяпер актыўна працуем над пракладкай інжынерных сетак, абуладкаваннем дарог, заездаў і гасцявых парковак, фарміраваннем адхонаў. Ужо гатовы цокаль адміністрацыйна-бытавога корпуса, дзе будзе таксама зона грамадскіх прыбіральняў, заліта бетонная аснова пад дзве гасцявыя паркоўкі з боку Лідскай і Нёманскай на 84 і 32 машынамесцы. У зоне культурна-масавых мерапрыемстваў прыступілі да брукавання тратуарных дарожак», — расказаў Ваяводскі.
Як зменіцца парк
Гэтых самых дарожак у парку стане значна больш. Пліткі расходуецца неймаверная колькасць — усяго 13 відаў! Абяцаюць разнастайныя кампазіцыйныя і каляровыя рашэнні. Характэрна, што малюнак брукавання пляцовак для масавых мерапрыемстваў будзе выкананы па матывах арнаментаў Венесуэлы.
Фота: Мінбуд
Яшчэ некалькі важных лічбаў: у парку паставяць таксама 24 км бардзюраў, пакладуць 13 тыс. «квадратаў» спартыўнага пакрыцця.
Абяцаюць, што гэтая тэрыторыя будзе патанаць у зеляніне. На плоскіх паверхнях і адхонах пакладуць 55 тысяч квадратных метраў газона. Таксама высадзяць 736 дрэў і больш за 3 тысячы дэкаратыўных кустоў.
Фота: Мінбуд
Ландшафтны дызайн наогул прадуманы да дробязяў. Улічаны перапады вышынь і стромкія схілы — будуць створаны сістэмы падпорных сценак і каскады пад'ёмаў з прамежкавымі краявіднымі пляцоўкамі, якія абсталююць перголамі і лаўкамі.
Забавы ў парку
Пасля рэканструкцыі там з'явяцца дзве горкі для катання на цюбінгах, веладарожка, сцежка здароўя, пляцоўкі для скейтбардыстаў, заняткаў варкаўтам і паркурам. Будзе месца як для масавых мерапрыемстваў, так і ціхага адпачынку.
Фота: Мінбуд
Для дзяцей арганізуюць дзіцячы гульнявы гарадок «Казачнае каралеўства». Абяцаюць нават «Кола агляду», але яно, калі і з'явіцца, то крыху пазней.
Чытайце таксама:
Свяцкі палац — твор італьянскага майстра для прускага графа са старажытнага беларускага роду
У кожным раёне Мінска сёлета зробяць зоны адпачынку. Дзе іх размесцяць і што там будзе