Столтэнберг: Пагадненне аб размяшчэнні ядзернай зброі ў Беларусі з'яўляецца непрымальным
Генеральны сакратар НАТА Енс Столтэнберг пракаментаваў нядаўна падпісанае пагадненне аб перамяшчэнні расійскай тактычнай ядзернай зброі ў Беларусь.
30.05.2023 / 22:51
Генсек НАТА Екс Столтэнберг. Фота: НАТА
Генеральны сакратар НАТА Енс Столтэнберг падчас свайго візіту ў Осла пракаментаваў навіну аб размяшчэнні расійскай тактычнай ядзернай зброі ў Беларусі. Яго словы 30 мая прыводзіць нарвежскае выданне Nettavisen.
На думку Столтэнберга, любыя падпісаныя паміж Беларуссю і Расіяй дамоўленасці аб распаўсюджванні ядзернай зброі з'яўляюцца «вельмі безадказнай і небяспечнай рыторыкай».
«Тое, што мы бачым з расійскага боку — гэта вельмі безадказная і небяспечная рыторыка, якая зноў пагражае свету ядзернай зброяй. Гэта небяспечна і непрымальна, а сама Расія павінна зразумець, што ядзерны канфлікт ні яна, ні хто-небудзь яшчэ ніколі не выйграе», — заявіў Енс Столтэнберг.
Паводле яго слоў, НАТА ўважліва адсочвае ўсе дзеянні Расіі, аднак не бачыць нейкага сур'ёзнага дысбалансу сіл у рэгіёне, які патрабуе ад арганізацыі якой-небудзь рэакцыі.
Нагадаем, што раней Аляксандр Лукашэнка паведаміў, што Расія нібыта ўжо пачала перамяшчаць сваю тактычную ядзерную зброю ў Беларусь. Аднак сам Крэмль гэтыя словы ніяк не пацвердзіў.
Чытайце таксама:
«Нават ядзерная зброя адна на дваіх». Такаеў лічыць праблемай Саюзную дзяржаву ў складзе ЕАЭС