Pratasievič pryjšoŭ na intervju na kanał Sałaŭjova. U jaho spytali, ci zabiŭ by jon Puciłu
Na kanale rasijskaha prapahandysta Uładzimira Sałaŭjova ź niadaŭniaha času iduć strymy biełaruskaha prapahandysta Ryhora Azaronki. U adzin z takich efiraŭ paklikali Ramana Pratasieviča, jakoha niadaŭna pamiłavali. U studyi na padłohu kinuli bieł-čyrvona-bieły ściah.
26.05.2023 / 18:14
Azaronak i Pratasievič. Skryn stryma
Azaronak uklučyŭ jamu emacyjny kamientar ciotki Safii Sapiehi, dzie taja aburałasia, što Pratasieviča pamiłavali, a Safija patrapiła ŭ pałon tamu, što ź im źviazałasia, i praciahvaje siadzieć u turmie.
«U nas roznyja [kryminalnyja] spravy, nie źviazanyja ničym, tamu zvalvać na mianie nie treba», — adkazaŭ na heta Pratasievič.
«Niahledziačy na toje, što my z Safijaj byli razam, ja nie mahu skazać pra jaje nivodnaha kiepskaha słova», — adznačyŭ jon.
Jaho paprasiła taksama prakamientavać słovy kiraŭnika «Bajpoł» Alaksandra Azarava, što jon šmat kaho zdaŭ. Pratasievič syšoŭ ad dakładnaha adkazu, zaŭvažyŭšy, što ŭ jaho bok časta hučać takija zakidy.
«Ale ja čamuści ŭ ŚMI nie bačyŭ, kab fihuravali kankretnyja proźviščy, kankretnyja ludzi. Naturalna, praściej zvalić na mianie i kazać, jaki ja niadobry. Niešta ja nie čuŭ, kab ja byŭ pracaŭładkavany…» — nie paśpieŭ skončyć jon svaju dumku.
Na praciahu ŭsiaho efiru Azaronak, niby na dopycie, staraŭsia prymusić Pratasieviča pakajacca za svajo pratesnaje minułaje.
Na padłohu studyi kinuli nacyjanalny biełaruski ściah. Fota apublikavaŭ praŭładny kanał
Zakranuli i temu vajny va Ukrainie. Pratasievič zaŭvažyŭ tolki, što dobra, što vajna nie pačałasia na terytoryi Biełarusi.
«Tamu što adchrenačyli vašych starońnikaŭ pa zadnicach. Było 100 sinich zadnic, i my hetym varatavali krainu», — zajaviŭ na heta Azaronak, pryznaŭšy praźmierny hvałt siłavikoŭ u bok pratestoŭcaŭ (raniej prapahanda i Łukašenka lubili zajaŭlać, što heta fejk, a sini koler — ad farby).
U kancy efiru Azaronak uklučyŭ rolik pad pieśniu sa słovami «vrah vsiehda ostajetsia vrahom», «ty pohibnieš, kohda požaleješ vraha».
Prapahandyst zhadaŭ niadaŭniaje intervju byłoha namieśnika ministra abarony hienierała Valdemara Skšypčaka. Toj ličyŭ, što «kali ŭkrainski kontrnastup skončycca pośpiecham, to tyja ŭzbrojenyja biełarusy, jakija składajuć častku bajavoha patencyjału ŭkrainskaj armii, nie składuć zbroi». «Jany pojduć na Biełaruś. Spadziajusia, što heta vykliča paŭstańnie ŭ Biełarusi, hetaha Łukašenka baicca», — kazaŭ hienierał.
Azaronak spytaŭ u Pratasieviča, na jakim baku toj budzie, kali padymiecca paŭstańnie.
«Kali ja padlahaju pryzyvu, dumaju, vidavočna, što ja pajdu pa pryzyvie», — adkazaŭ Pratasievič.
Raman Pratasievič. Skryn stryma
Prapahandyst udakładniŭ, jakoje jaho asabistaje staŭleńnie.
«Kali ja žyvu tut i heta maja ziamla, maja kraina, adpaviedna ja budu jaje abaraniać, chto b tam ni byŭ, bo nijakich asabistych simpatyj u mianie nie zastałosia», — skazaŭ Raman.
Paśla Azaronak vyrašyŭ spytać, ci ŭ jaho «zadryžyć ruka» zabić redaktara Nexta Ściapana Puciłu ŭ vypadku ŭzbrojenaha supraćstajańnia.
«U tym vypadku, kali heta budzie pahražać majmu žyćciu, kaniečnie», — adkazaŭ Pratasievič.
Ale paśla dadaŭ, što ŭ biazzbrojnych ludziej stralać nie budzie i spadziajecca, što nie zdarycca situacyja, kali daviadziecca brać zbroju ŭ ruki.
Čytajcie taksama:
Azaronak staŭ viadučym na sałaŭjoŭskim kanale
«Šalona ŭdziačny krainie i asabista prezidentu». Raman Pratasievič pamiłavany