Najbolšaja ekanomika Jeŭrasajuza ŭvajšła ŭ recesiju
Statystyki zafiksavali skaračeńnie VUP Niamieččyny na praciahu dvuch kvartałaŭ zapar. Heta aznačaje, što niamieckaja ekanomika ŭvajšła ŭ recesiju, piša Deutsche Welle.
25.05.2023 / 13:42
Ministr ekanomiki Niamieččyny Robiert Chabiek. Fota Michael Kappeler / AP
Fiederalnaje statystyčnaje viedamstva ŭ čacvier, 25 maja, skarektavała papiarednija acenki pa skaračeńni VUP Hiermanii z nula da minus 0,3 pracenta. «U vyniku niamieckaja ekanomika zafiksavała dva kvartały ź niehatyŭnym vynikam zapar i, zhodna ź dziejnaj terminałohijaj, uvajšła ŭ recesiju», — havorycca ŭ paviedamleńni viedamstva.
U čacviortym kvartale 2022 hoda VUP Niamieččyny skaraciŭsia ŭ paraŭnańni z papiarednim kvartałam na 0,5 pracenta. Vysokija tempy rostu darahoŭli praciahvali admoŭna ŭpłyvać na ekanomiku FRN i ŭ pačatku hetaha hoda, kanstatavali ekśpierty.
Asabliva prykmietna heta adbiłasia na pryvatnych spažyvieckich vydatkach — u pieršym kvartale jany źnizilisia na 1,2 pracenta. «U paraŭnańni z papiarednim kvartałam pryvatnyja chatnija haspadarki tracili mienš srodkaŭ na pradukty charčavańnia, napoi, adzieńnie, abutak i meblu», — adznačyli statystyki. Spažyŭcy radziej kuplali novyja aŭtamabili.
Dziaržaŭnyja vydatki na spažyvańnie taksama prykmietna skaracilisia — na 4,9 pracenta ŭ paraŭnańni z papiarednim kvartałam.
U toj ža čas pazityŭnyja impulsy atrymany ad źniešniaha handlu — pradpryjemstvy ekspartavali na 0,4 pracenta bolš tavaraŭ i pasłuh, čym u apošnim kvartale 2022 hoda.