U jakim stanie znachodzicca miedycyna praz amal 30 hod łukašenkaŭskaha kiravańnia? Heta tolki toje, što apubličyli
Na ŭčarašniaj naradzie ŭ Łukašenki pa miedycynie čynoŭniki faktyčna raśpisalisia ŭ tym, što hadami nie mohuć vyrašyć prablemy achovy zdaroŭja. «Ja była ŭražana», — kazała Natalla Kačanava, niby jaje tolki što pryznačyli.
24.05.2023 / 16:59
Pieraličym tezisna, što z prablem prahučała.
Narada Łukašenki. Čynoŭniki abmiarkoŭvajuć situacyju ŭ miedycynie. Fota: belta.by
Kadraŭ nie chapaje, ścieny razburajucca
Hałoŭnaja doktarka Respublikanskaha kliničnaha miedcentra Kiraŭnictva spraŭ Łukašenki Iryna Abielskaja pryznała toje, što nie tajamnica: balnicy nie ŭkamplektavanyja kadrami.
Pra niedachop kadraŭ havorycca daŭno. Zhodna z nacyjanalnym bankam vakansij, miedyčnym ustanovam krainy patrabujecca 4910 daktaroŭ-śpiecyjalistaŭ, 4066 miedsiaścior, 2750 sanitaraŭ.
Miedyki niezadavolenyja zarobkam dy zabiaśpiečanaściu žyllom.
Jość prablemy z vyrabami miedyčnaha pryznačeńnia i miedabstalavańniem, kazała Abielskaja, jakaja niadaŭna z admysłovaj kamisijaj jeździła praviarać balnicy.
Iryna Abielskaja (druhaja sprava) na naradzie ŭ Łukašenki. Fota: belta.by
Łukašenku ahučyŭ, što «dahetul jość aburalnyja prablemy bardaku ŭ balnicach, paliklinikach, FAPach».
«Ścieny i stoli razburajucca, dźviery pakasilisia, elemientarnyja sanitarnyja praviły nie vykonvajucca. (…) Pryčym takoje zdarajecca navat u piedyjatryčnych addzialeńniach…» — pieraličyŭ Łukašenka.
Staršynia kamiteta dziaržkantrolu Vasil Hierasimaŭ siarod niedachopaŭ zhadaŭ vialikija čerhi. Niekatoryja pracedury treba čakać da 5 miesiacaŭ. A ŭ Rahačoŭskim rajonie čarha na prachodžańnie MRT raściahnułasia bolš čym na hod.
Vakcynacyja na papiery, karupcyja, zakryćcio FAPaŭ
Hienieralny prakuror Andrej Švied siarod prablemaŭ nazyvaŭ: niedachop kadraŭ, niemetazhodnaje raschodavańnie srodkaŭ ad pazabiudžetnaj dziejnaści, biurakratyju.
Pryznaŭ i pahoniu za pakazčykami vakcynacyi.
«Sioleta my vyjavili ŭ Minskaj i Homielskaj abłaściach fakty taho, što vykidvajucca na śmietnicu prydatnyja da ŭžyvańnia vakcyny suprać kavidu. 6 405 upakovak vyjaŭlena na zvałkach i śmietnikach u Homielskaj i Minskaj abłaściach», — raskazaŭ hienprakuror.
«Na pavierchni lažyć pahonia za pakazčykami pa vakcynacyi nasielnictva», — kanstatavaŭ jon.
Švied taksama havaryŭ pra karupcyju. Za minuły i hety hod raspačata 60 kryminalnych spraŭ. Pavodle prakurora, kiraŭniki miedyčnych ustanoŭ Minska za košt kavidnych vypłat pavysili sabie zarobki da 700 pracentaŭ. Tym časam, piersanału, jaki pracavaŭ u kavidnych addzialeńniach, dapłata skłała tolki 27-29 pracentaŭ.
Na vioskach niepradumana začyniajuć fielčarska-akušerskija punkty, zamianiajučy ich pierasoŭnymi miedyčnymi kompleksami.
«FAP zakryvajuć pierš, čym paśpiavajuć pastavić u rajon pierasoŭny miedpunkt, i viaskoŭcam davodzicca źviartacca pa dapamohu ŭ susiednija vioski», — ukazvaŭ prakuror.
«Fakty ŭzrušyli navat hienprakurora»
Apisvajučy naradu, prapahanda padkreślivała, jak «ździvilisia» Łukašenka i inšyja vyšejšyja čynoŭniki prablemam u miedycynie, što hadami imi ža nie vyrašajucca.
«Ja była ŭražana», — pryvodzić STB słovy Kačanavaj.
«Łukašenka raskazaŭ, što jaho bolš za ŭsio ździviła z vyjaŭlenych u achovie zdaroŭja prablem», — daje zahałovak BiełTA.
«Niekatoryja fakty ŭzrušyli navat hienprakurora», — piša dziaržaŭnaje ahienctva ŭ inšym tekście.
Alaksandr Łukašenka na kamiery adčytvaje čynoŭnikaŭ. Fota: pres-słužba Łukašenki
Hetaj naradaj Łukašenka, vidać, chacieŭ pakazać, što jon za ŭsim sočyć i naviadzie paradak. Ale nasamreč atrymałasia inšaje:
jon sam i vyšejšyja čynoŭniki raśpisalisia ŭ tym, što što tak i nie zmahli za stolki hadoŭ kardynalna palepšyć situacyju ŭ achovie zdaroŭja. Prablemy, jakija «ŭražvali da hłybini dušy» funkcyjanieraŭ, absalutna nie novyja.
Miedyki, ź jakimi «Našaj Nivie» udałosia pahutaryć, kažuć, što narada nahadvała zrežysavanaje šoŭ.
«Vypuścili par pierad nasielnictvam. Heta ŭcioki ad prablemy», — ličyć adzin z daktaroŭ.
Vyrašeńnie kadravaha pytańnia Łukašenka bačyć prosta — razabracca z metavikami.
Surazmoŭcy «Našaj Nivy» adznačajuć, što prablemy ź miedyčnymi kadrami nie vyrašajucca pahrozami i naradami. Heta hłabalnaja dla ciapierašniaj Biełarusi prablema, źviazanaja z ahulnaj situacyjaj u krainie i nie tolki ŭ sistemie achovy zdaroŭja. I vyrašyć usio da 1 studzienia, jak adrapartavaŭ Łukašenka, nierealna.
«Najlepšyja daktary zjazdžajuć, i spynić adtok kadraŭ možna, tolki zakryŭšy miažu. Jakaść padrychtoŭki maładych śpiecyjalistaŭ sapraŭdy, vyklikaje šmat narakańniaŭ. Trapiŭšy ŭ kalektyŭ balnicy im niama ŭ kaho vučycca. Kab uzhadavać kvalifikavanaha śpiecyjalista patrabujucca hady. Składvajecca ŭražańnie, što ŭsio ŭ biełaruskaj miedycynie vyradžajecca. Nie dumaju, što da 1 studzienia 2024 hodu čynoŭniki znojduć efiektyŭnyja zachady, kab papravić situacyju», — adznačaje adzin z surazmoŭcaŭ.
Miedyki adznačajuć, što biełaruskaja sistema achovy zdaroŭja ŭ mnohim zachavała savieckija padychody ŭ arhanizacyi lačeńnia ludziej. U Savieckim Sajuzie davodziłasia taksama jeździć z rajonaŭ u abłasnyja centry dy stalicu pa nieabchodnaje lačeńnie.
Źmieny ŭ biełaruskaj miedycyny adbyvajucca situacyjna: uźnikaje prablema i jaje biarucca vyrašajuć, kažuć daktary.
«Nadyšła pandemija i ŭsio abrynułasia, — tłumačyć adzin ź miedykaŭ. — Potym pačalisia represii. Stała nievynosna pracavać. Śpiecyjalisty pajechali za miažu.
I ŭ toj ža čas mnohich i mnohich daktaroŭ zvalniajuć za niełajalnaje staŭleńnie da ŭłady. Prymušajuć pisać zajavy. Pra heta na naradzie ni słova nie było skazana…»
Hladzicie taksama:
«Ja nie źbiraŭsia kapać akopy». Miedyk z rajcentra raskazvaje, čamu bolš nie vytrymaŭ
U Škłovie zvolnili kiraŭnika rajonnaj balnicy. Ën zaklikaŭ raŭniacca na Łukašenku