«Дазволіў сабе ганьбіць БРСМ, віну прызнаю». На манер ГУБАЗіКа юрфак БДУ стаў публікаваць «пакаяльныя відэа»
Юрыдычны факультэт БДУ пераняў заганныя практыкі сілавікоў і стаў запісваць відэа са студэнтамі, дзе прымушае іх выбачацца.
24.05.2023 / 11:43
Скрын відэа, якое выклаў юрфак БДУ. У арыгінале твар не схаваны і студэнт называе сваё імя
Такое відэа юрфак апублікаваў у сторыз свайго інстаграм-акаўнта.
У ім студэнт-трэцякурснік на фоне эмблемы БДУ і выявы Феміды выбачаецца перад адміністрацыяй факультэта і БРСМ.
«Я, студэнт трэцяга курса БДУ, дазваляў сабе распаўсюджваць дыскрэдытуючыя звесткі ў адносінах да адміністрацыі юрыдычнага факультэта, а таксама звесткі, якія ганьбяць БРСМ юрыдычнага факультэта. Сваю віну цалкам прызнаю, каюся. На аснове сваіх памылак рэкамендую моладзі пільна сачыць, што каму і дзе і ў якой сітуацыі яны гнавораць, а таксама працаваць на карысць сваёй краіны», — агучвае ў відэа студэнт тэкст, які, відавочна, яго прымусілі сказаць.
Юрыдычная супольнасць адрэагавала на такое парушэнне правоў.
Экспертка ў наліне міжнароднага права і правоў чалавека Кацярына Дэйкала заўважае: парадаксальна, што менавіта юрфак, дзе павінны былі б вучыць паважаць правы, пераняў такую практыку.
«Звярніце ўвагу, (і гэта самае страшнае), што робяць гэта моладзевыя арганізацыі факультэта. Не ГУБАЗ, не КДБшнікі, а моладзевыя арганізацыі факультэта, якія нават не саромеюцца ставіць свае тэгі: студсаюз юрфака, студэнцкі прафсаюз і БРСМ.
У хлопцаў — будучых юрыстаў нават не хапае кемлівасці, каб зразумець, што гэта ўсё — доказы, якія фіксуюцца. У камсамольскім запале так хочацца адзначыцца: мы насралі і напісалі горда «гэта зрабілі мы»!
Ну і нагадаю, што менавіта парушаецца такім відэа: свабода ад зневажальнага годнасць звароту, свабода выказвання меркавання, права на неўмяшанне ў асабістае жыццё і права на адукацыю (у частцы стварэння спрыяльнай атмасферы без абраз і прыніжэння годнасці ў адукацыйным установе)», — пракаментавала ў фэйсбуку Кацярына Дэйкала.
На тое, што гэтым відэа факультэт парушае закон, звяртае ўвагу і адвакатка Марыя Колесава-Гудзіліна.
«Прымус да ўдзелу ў такіх роліках парушае свабоду выказвання меркаванняў. Гэта прамое парушэнне прэзумпцыі невінаватасці, калі чалавек вымушаны ў непрацесуальнай форме прызнацца ў здзяйсненні забароненых дзеянняў.
Такое відэа парушае права не падвяргацца жорсткаму, бесчалавечнаму і зневажальнаму абыходжанню або катаванням.
Я ўпэўнена, што тых, хто прымушае здымацца ў падобных відэа, можна прыцягнуць да адказнасці. Гэта трапляе пад кваліфікацыю арт. 426 Крымінальнага кодэкса (злачынства супраць чалавечнасці, якое здзяйсняецца прадстаўніком дзяржавы)»,
— падкрэслівае Колесава-Гудзіліна.