Апублікаваны праект закона пра народнае апалчэнне. Расказваем, што ў ім
На Нацыянальным прававым партале апублікавалі праект закона пра народнае апалчэнне. Апалчэнцам плануюць дазволіць затрымліваць людзей і прымяняць зброю. Некаторыя з гэтых планаў ужо агучваліся ўладамі раней.
23.05.2023 / 17:39
Апалчэнцы Ваўкавыскага раёна. Фота: Максім Гарлуковіч, агенцтва «Ваяр»
Народнае апалчэнне, пішацца ў праекце закона, будзе стварацца з ліку добраахвотнікаў, якіх узброяць.
Асноўная яго задача — садзейнічаць тэрытарыяльным органам унутраных спраў у забеспячэнні ваеннага становішча, абароне ўласнасці ад злачынных і іншых супрацьпраўных замахаў.
Мясцовымі саветамі абароны народнае апалчэнне можа прыцягвацца і для іншых задач па забеспячэнні ваеннага становішча.
Забяспечвацца гэтае апалчэнне будзе за кошт мясцовых бюджэтаў, а таксама ахвяраванняў.
Колькасць апалчэнцаў у кожным раёне будзе залежаць ад колькасці ахвотных і задач, якія ім ставяць.
Пры адмене ваеннага становішча апалчэнне расфармоўваюць.
Атрады камплектуюцца добраахвотнікамі, «здольнымі па сваіх асабістых якасцях, стане здароўя выконваць задачы, прадугледжаныя гэтым законам».
Удзел у апалчэнні не вызваляе ад прызыву на ваенную службу па мабілізацыі і ад працы.
Але, па рашэнні мясцовых органаў наймальнік абавязаны вызваляць работніка ад працы для ўдзелу ў дзейнасці народнага апалчэння. Пры гэтым за работнікам захоўваецца месца працы, пасада служачага і сярэдні заробак.
Каго не могуць залічыць у апалчэнцы?
- тых, хто адбывае арышт, адпраўлены на хімію з накіраваннем ці пазбаўлены волі;
- тых, хто ў СІЗА ці пад хатнім арыштам;
- тых, каго вырашана інтэрніраваць;
- людзей, якія прызнаны недзеяздольнымі ці абмежавана дзеяздольнымі;
- тых, хто мае захворванні ці фізічныя недахопы, пры наяўнасці якіх супрацьпаказана валодаць зброяй.
Апалчэнцы размяшчаюцца па месцы жыхарства.
Агульнае кіраўніцтва апалчэннем даручаць мясцовым саветам абароны. А непасрэдна кіраваць атрадамі будуць тэрытарыяльныя органы ўнутраных спраў.
Рашэнне ад фарміраванні апалчэння будзе прымаць Лукашэнка.
Што зможа апалчэнец?
- прымяняць фізічную сілу, выкарыстоўваць зброю на ўмовах і ў межах, устаноўленых заканамі для ваеннаслужачых, прыцягнутых да забеспячэння ваеннага становішча;
-
затрымліваць асоб, якія ўчынілі злачынства або адміністрацыйнае правапарушэнне, каб перадаць сілавікам;
- патрабаваць ад грамадзян захавання грамадскага парадку, абмежаванняў і забарон, уведзеных для забеспячэння ваеннага становішча, спынення правапарушэнняў або дзеянняў, якія перашкаджаюць выкананню ім задач;
-
садзейнічаць тэрытарыяльным органам унутраных спраў пры абмежаванні руху транспарту, надглядзе аўто, пропуску транспарту, праверцы дакументаў жыхароў, надглядзе іх асабістых рэчаў і канфіскацыі (калі рэчы могуць з'яўляцца прыладай або непасрэдным аб'ектам правапарушэння), аглядаць жыллё іншых людзей.
Добраахвотнікам таксама могуць быць нададзены іншыя правы, пішацца ў праекце закона.
Сярод абавязкаў апалчэнцаў:
- забяспечваць абарону тэрыторыі, аб'екта і насельніцтва ад супрацьпраўных замахаў;
- удзельнічаць у зборы і перадачы інфармацыі органам ваеннага кіравання Узброеных Сіл Рэспублікі Беларусь і тэрытарыяльным органам унутраных спраў аб дзеяннях войскаў праціўніка, выяўленні асоб, якія садзейнічаюць сілам праціўніка;
- аказваць першую дапамогу грамадзянам, якія пацярпелі ў выніку правапарушэнняў або няшчасных выпадкаў, а таксама якія знаходзяцца ў бездапаможным ці іншым стане, які прадстаўляе пагрозу для жыцця і здароўя чалавека;
- садзейнічаць у аварыйна-выратавальных і іншых неадкладных работ;
- удзельнічаць у выкананні работ абароннага характару, ліквідацыі наступстваў прымянення зброі, аднаўленні пашкоджаных (разбураных) аб'ектаў эканомікі, сістэм жыццезабеспячэння і ваенных аб'ектаў, а таксама ў ліквідацыі наступстваў надзвычайных сітуацый і працы арганізацый, якія падлягаюць пераводу на працу ва ўмовах ваеннага часу.
Закон пакуль не прыняты.
Раней міністр абароны Віктар Хрэнін расказваў, што па яго разліках у народнае апалчэнне можа ўвайсці 100-150 тысяч чалавек.
Чытайце таксама:
У Беларусі ўпершыню паказалі народнае апалчэнне
Вальфовіч пра народнае апалчэнне: Ім выдадуць стралковую зброю, якая будзе захоўвацца пры іх