Pačaŭsia sud nad Eduardam Babarykam. Jaho trymali ŭ SIZA try hady
Siońnia ŭ 11:00 pačałosia sudovaje pasiadžeńnie pa kryminalnaj spravie ŭ dačynieńni da 33-hadovaha Eduarda Babaryki, syna byłoha staršyni praŭleńnia Biełhazprambanka, pretendenta na post prezidenta na vybarach 2020 hoda Viktara Babaryki.
22.05.2023 / 11:10
Kryminalnuju spravu budzie razhladać Minski abłasny sud u vyjaznym sudovym pasiadžeńni ŭ pamiaškańni suda Minskaha rajona.
Baćku i syna Babarykaŭ zatrymali 18 červienia 2020 hoda. Eduard uznačalvaŭ pieradvybarčy štab baćki, ich spynili, kali jany vieźli ŭ CVK podpisy, sabranyja dla vyłučeńnia Viktara Babaryki kandydatam u prezidenty.
Za kratami biez suda Eduard znachodziŭsia amal try hady.
Eduarda Babaryku buduć sudzić za nibyta ŭchileńnie ad vypłaty padatkaŭ, lehalizacyju srodkaŭ, atrymanych złačynnym šlacham, dapamohu ŭ arhanizacyi masavych biesparadkaŭ i raspalvańni varožaści.
Jamu pahražaje da 20 hadoŭ źniavoleńnia.
Pravaabaroncy aceńvajuć hetyja abvinavačańni jak palityčna matyvavanyja, ličać, što syna aryštavali dla cisku na baćku.
Pra los samoha Viktara Babaryki ničoha nie viadoma ŭžo miesiac. Raniej paviedamlałasia, što ŭ noč z 24 na 25 krasavika Viktar Babaryka byŭ špitalizavany z kałonii Navapołacka ŭ balnicu. Dalejšaje miescaznachodžańnie palitviaźnia nieviadomaje.
12 maja źjaviłasia infarmacyja ad pravaabaroncaŭ, što da svajho atrada ŭ navapołackaj kałonii jon nibyta ŭžo nie prypisany, a paźniej — pra toje, što jaho nibyta pieraviali ŭ turemnuju balnicu pry SIZA-1 u Minsku. Ni advakaty, ni rodnyja nie zmahli ź im pabačycca.
Čytajcie taksama:
Były palitviazień z navapołackaj kałonii raskazaŭ, jakoha kampramisu patrabavali ad Babaryki
«Ja vielmi nie lublu termin spraviadlivaść». Eduard Babaryka daŭ intervju ź SIZA