У Грузіі адбыліся сутычкі з-за дачкі Лаўрова
Сутыкненні паліцыі з мітынгоўцамі ідуць у раёне гасцініцы Kvareli Lake Resort у Кахетыі на ўсходзе Грузіі — як мяркуецца, тут знаходзіцца дачка кіраўніка МЗС РФ Сяргея Лаўрова, якая прыехала на вяселле члена сям'і, піша Newsgeorgia.ge
20.05.2023 / 15:22
Newsgeorgia.ge
На месцы мабілізаваныя супрацоўнікі паліцыі і спецназ, сцягваюцца дадатковыя сілы.
МУС пацвердзіла затрыманне 16 чалавек. Удзельнікі акцыі заяўляюць, што паліцыя адбірае ў іх мабільныя тэлефоны з запісамі таго, як картэж з гасцямі з Расіі праязджае на тэрыторыю гатэля.
Удзельнікі пратэстаў патрабуюць ад грамадзян Расіі неадкладна пакінуць тэрыторыю гатэля.
Па паведамленнях СМІ, сёння ў комплексе Kvareli Lake Resort будзе адзначацца вяселле брата мужа Кацярыны Вінакуравай (Лаўровай). Брат расійскага прадпрымальніка Аляксандра Вінакурава, які прыходзіцца кіраўніку МЗС РФ зяцем, раней распісаўся са сваёй выбранніцай у Тбілісі.
Гасцініца спачатку адмаўляла, што ў іх гасцююць члены сям'і міністра замежных спраў Расіі, але затым перастала адказваць на пытанні журналістаў.
Гэта не першы выпадак, калі з Грузіі праганяюць вядомых персон з Расіі. Два гады таму журналіст Уладзімір Познер, які прыляцеў адзначыць дзень нараджэння, быў вымушаны пакінуць Тбілісі на фоне акцый пратэсту.
Чытайце таксама:
Падсанкцыйная дачка Лаўрова прыехала ў Грузію, каб пагуляць на вяселлі — СМІ