Dzianis Urbanovič atrymaŭ čacviortaje ranieńnie. U Bachmucie
Jak stała viadoma «Našaj Nivie», lidar «Maładoha Frontu», a ciapier — bajec bataljona «Vołat» Pałka imia Kastusia Kalinoŭskaha Dzianis Urbanovič atrymaŭ užo čacviortaje ranieńnie na vajnie za niezaležnaść Ukrainy.
18.05.2023 / 14:36
Dzianis Urbanovič. Fota ź jaho staronki ŭ Fejsbuku
Ranieńnie bajec atrymaŭ u Bachmucie, dzie ciapier vajuje ŭ tym liku bataljon «Vołat» pałka Kastusia Kalinoŭskaha.
Pra heta «Našaj Nivie» paviedamili pabracimy bajca. Ranieńnie bajca charaktaryzujuć jak «nie ciažkaje». Jon znachodzicca na lačeńni.
Sam Urbanovič pakul svajho stanu nie kamientavaŭ.
Heta ŭžo čacviortaje ranieńnie lidara «Maładoha Frontu».
Da taho raz jaho kantuziła, askiepak zalataŭ u ruku, a kula — u hrudzi. Kožny raz Dzianis viartaŭsia na front.
«Trapiła kula prosta ŭ hrudzi i pajšła pa ciele, dy ŭpierłasia ŭ rebry. Dychać nie vielmi dobra, lohkaje paškodžanaje», — flehmatyčna apisvaŭ adno sa svaich papiarednich ranieńniaŭ kalinoviec.
Dzianis Urbanovič maje pazyŭny «Vaŭkałak».
Viadoma pra 22 biełarusaŭ, jakija zahinuli paśla lutaha 2022-ha, baroniačy Ukrainu i Biełaruś. Jašče čacviora źnikli bieź viestak, dvoje trapili ŭ pałon. Usiaho ŭ składzie ŭkrainskaj armii vajuiuć sotni hramadzian biełarusaŭ.
Bai za Bachmut iduć užo 9 miesiacaŭ. Hety kirunak zastajecca adnym z samych haračych miescaŭ na froncie. Ad 10 maja ŭkrainskija vojski tut pierajšli ŭ kontrnastup i ŭ zaciatych bajach viarnuli kantrol nad 25 kvadratnymi kiłamietrami na poŭnač i paŭdniovy zachad ad horad, u tym liku nad šeraham važnych vyšyń.
Tak ciapier vyhladaje Bachmut. Fota: 24 miechbryhada USU imia Karala Daniły
Čytajcie taksama:
Biełaruskija padraździaleńni panieśli ciažkija straty pad Bachmutam. Niekalki čałaviek zahinuła
Jak acenka siłaŭ biełaruskich dobraachvotnikaŭ upłyvaje na palityku Łukašenki