Кіраўнік украінскай разведкі прызнаўся, што Украіна працавала з Лукашэнкам праз дэпутата Шаўчэнку
Кіраўнік Галоўнага ўпраўлення разведкі Украіны Кірыла Буданаў у сваім інтэрв'ю праграме «Розныя людзі» закрануў пытанне адносін падчас вайны з рэжымам Лукашэнкі і каналаў камунікацыі з ім.
16.05.2023 / 18:24
Яўген Шаўчэнка ў Вярхоўнай Радзе Украіны
Журналіст у ходзе інтэрв'ю звярнуў увагу на тое, што з Беларусі ўжо дастаткова даўно нічога не ляціць на тэрыторыю Украіны і пацікавіўся думкай Буданава, вынікам чаго гэта ёсць: дыпламатычных дамоўленасцяў з Лукашэнкам ці ягонага страху перад адказам з боку Украіны.
Буданаў сказаў, што гэта вынік і таго і другога ў комплексе, а
Лукашэнка не ідыёт: ён, маўляў, зрабіў высновы з папярэдняга досведу і таму паўтарэння таго, што адбылося 24 лютага 2022 года, чакаць не варта.
Адносна каналаў камунікацыі з Лукашэнкам — то, паводле слоў Буданава, задзейнічаліся ўсе магчымыя каналы, у тым ліку і пасярэдніцтва аднаго блізкага да Лукашэнкі ўкраінскага дэпутата. Спачатку ён не называў імя дэпутата, але пасля прамога пытання журналіста сказаў, што гэта Яўген Шаўчэнка:
«Мы карыстаемся магчымасцямі яго камунікацыі, яго сувязямі. У прынцыпе, мы ніколі гэтага моцна не хавалі. І ён эфектыўны ў гэтым працэсе. Шаўчэнка дастаткова даўно дапамагае нам, давайце так гэта назавём. І ніводнага разу не адмаўляў, калі мы звярталіся з пэўнымі просьбамі да яго».
Адносна таго, ці намагаецца Пуцін яшчэ ўцягнуць Лукашэнку ў вайну, то Буданаў лічыць, што ён ужо страціў надзею гэта зрабіць. Патрэбныя боепрыпасы, маўляў, з Беларусі ўжо практычна ўсе вывезеныя, палігоны выкарыстоўваюцца — але на гэтым і ўсё.
Названага Буданавым дэпутата Яўгена Шаўчэнку беларусы добра ведаюць яшчэ з часоў, якія папярэднічалі расійскаму нападу на Украіну з тэрыторыі Беларусі. І ведаюць не з добрага боку. Гэты палітык набыў вядомасць як актыўны прыхільнік Лукашэнкі і ягоны палітычны лабіст ва Украіне. З самага пачатку беларускіх паслявыбарчых пратэстаў Шаўчэнка шмат выказваўся на беларускія тэмы, на ўсе лады расхвальваючы рэжым і ягоныя дзеянні, апанентаў жа рэжыму ён усяляк пляжыў, не спыняючыся і перад прамымі іх абразамі.
Сам дэпутацкі статус Шаўчэнкі беларуская прапаганда ўсяляк выкарыстоўвала для імітацыі легітымнасці цяперашняй беларускай улады ў вачах палітычнай эліты суседняй краіны. Ён наведваў многія прапагандысцкія мерапрыемствы рэжыму, у тым ліку т. зв. Усебеларускі народны сход 2021 года, а на «Славянскім базары» ў тым жа годзе выступіў нават у ролі не толькі пралукашэнкаўскага прапагандыста, але і спевака.
Яшчэ перад пачаткам шырокамаштабнай вайны з'яўляліся паведамленні пра тое, што супраць Шаўчэнкі нібыта заведзеная крымінальная справа, што пасля не пацвердзілася. Пасля пачатку вайны таксама паведамлялася пра арышт Шаўчэнкі, а пасля ён прыходзіў у Вярхоўную Раду ў вайсковай форме, за што падвяргаўся хэйту з боку калег. Тады ён публічна заявіў, што з'яўляецца супрацоўнікам Галоўнага ўпраўлення разведкі, і паказаў адпаведнае пасведчанне.