Рамзан Кадыраў заплаціў украінскім спецслужбам за вяртанне свайго каня з Чэхіі
Паводле ж расійскага заканадаўства, падобнае можа лічыцца вельмі сур'ёзным крымінальным злачынствам.
15.05.2023 / 21:19
Фота: тэлеграм-канал Рамзана Кадырава
Кіраўнік Чачні Рамзан Кадыраў 15 мая распавёў у сваім тэлеграм-канале аб вяртанні свайго зніклага ў Чэхіі каня па мянушцы Зазу. Паводле яго слоў, для гэтага ён кантактаваў з прадстаўнікамі «ўкраінскіх спецслужбаў».
Зазу з'яўляецца 16-гадовым гнядым жарабцом, які з'яўляецца ўласнасцю кіраўніка Чачні і таму быў замарожаны ў якасці яго актыву пасля ўвядзення санкцый у 2014 годзе. У сакавіку з'явілася навіна, што конь знік з адной з чэшскіх стайняў і хутчэй за ўсё быў скрадзены.
«У пачатку года на мяне праз пасярэдніцтва выйшлі прадстаўнікі ўкраінскіх спецслужбаў, якія прапанавалі выкупіць Зазу. Яны ведалі пра маю прыхільнасць да скакуна і не пралічыліся — канешне ж я пагадзіўся. І абышлося мне гэтае вяртанне ў 18 тысяч даляраў. Чыстыя капейкі, улічваючы яго рэальны кошт», — распавёў Кадыраў.
Раней той заяўляў, што ягоны конь можа каштаваць 10 мільёнаў даляраў. І нават нягледзячы на моцнае разыходжанне паміж коштам жарабца і коштам яго выкупу, гэтая здзелка з'яўляецца вельмі сумнеўнай з пункту гледжання расійскага крымінальнага кодэкса.
Рэч у тым, што, напрыклад, па інфармацыі той жа расійскай Федэральнай службы па фінансавым маніторынгу ад сакавіка мінулага года, «аказанне фінансавай, матэрыяльна-тэхнічнай і іншай дапамогі Украіне, у тым ліку УСУ, цягне крымінальную адказнасць па арт. 275 КК РФ («Дзяржаўная здрада»)».
Так што Кадыраву за фінансаванне ўкраінскіх спецслужбаў нават на 18 тыс. даляраў, паводле расійскага заканадаўства, павінна пагражаць да 20 гадоў пазбаўлення волі.
Чытайце таксама:
Кадыраў распавёў, чаму пастаянна кажа «дон»
Кадыраў адмовіўся сустракацца з чачэнцамі, што трапілі ў палон. І адправіў іх зноў на фронт