Pad Bachmutam źniščanaje kamandavańnie rasijskaj 4-j motastrałkovaj bryhady
Što jašče novaha na vajnie za apošnija sutki?
14.05.2023 / 09:54
Bai za Bachmut iduć užo paŭhoda. Horad pieratvorany ŭ ruiny. Fota 24-j miechbryhady USU imia Karala Daniły
Rasiejski vajskoviec, suviazist 4-j motastrałkovaj bryhady Uzbrojenych siłaŭ Rasii Andrej Marozaŭ u svaim telehram-kanale zajaviŭ, što 12 maja ŭkrainskaja artyleryja nakryła štab jaho bryhady pad Bachmutam.
Zabityja kambryh i načalnik štaba, a taksama aficer 2-ha korpusa, u jaki ŭvachodzić bryhada.
4-ja bryhada viała bai na poŭnač ad Bachmuta, zamianiŭšy tam paškamutanyja ŭkraincami siły PVK «Vahnier».
Nahadajem, što 10—12 maja mienavita jaje padraździaleńni byli vybityja ŭkraincami z šerahu važnych pazicyj i adkacilisia za Bierchoŭskaha vadaschovišča na niekalki kiłamietraŭ.
«U 4-j bryhadzie zabityja kambryh i načštaba bryhady, zahinuŭ aficer z upraŭleńnia 2 AK, jość inšyja zabityja i paranienyja aficery kiravańnia bryhady, ukropy [ukraincy] užo radasna pra heta napisali, tak što heta nie navina. Straty ŭ asabistym składzie ŭ bataljonach taksama jość», — napisaŭ Marozaŭ.
Ź inšych vajennych navin: siońnia ŭnačy rasijskija vojski nanieśli ŭdary bieśpiłotnikami i kryłatymi rakietami. Nad Kijevam usie bieśpiłotniki byli źbityja, zatoje niekalki kryłatych rakiet udaryli pa abjektach u prykarpackim abłasnym centry Ciarnopal. Paviedamlajecca pra razbureńni i paranienych. Učora anałahičnaja ataka była naniesienaja pa Chmialnickaj vobłaści ŭ centry Ukrainy.
A infarmavanaje rasijskaje vydańnie «Kommiersant» raskryła niekatoryja detali źbićcia dvuch samalotaŭ i dvuch viertalotaŭ nad Branskaj vobłaściu ŭčora.
«Viertaloty Mi-8, jakija raźbilisia ŭ Branskaj vobłaści, i źniščalniki Su-34 i Su-35 uvachodzili ŭ adnu avijahrupu i mahli być źbityja praktyčna adnačasova», — paviedamlaje Kommiersant.
Pavodle infarmacyi vydańnia, źniščalniki pavinny byli nanieści rakietna-bombavy ŭdar pa celach na terytoryi Čarnihaŭskaj vobłaści Ukrainy, a viertaloty — ich padstrachavać, kab u tym liku padabrać ekipažy Su, kali jany buduć źbityja ahniom praciŭnika. U vyniku ŭsie jany byli źniščanyja, ich ekipažy, usiaho 9 čałaviek, zahinuli.