«Minsk choča pierastrachavacca». Biełaruś uviała pahraničny kantrol na ŭjeździe z Rasii
Na darohach z Rasii źjavilisia pasty biełaruskich pamiežnikaŭ. U tych, chto ŭjazdžaje, praviarajuć pašparty.
05.05.2023 / 15:10
Uiezd u Biełaruś z Rasii. Fota vidavočcy z Zerkalo.io
U piatnicu 5 maja stali pastupać paviedamleńni, što na miažy z Rasijaj ź biełaruskaha boku staviać niešta nakštałt kantrolnych punktaŭ.
«Na vyjeździe z RB praz Dobruš ustaloŭvajuć niejkija KPP u vyhladzie cieramkoŭ. Pracujuć pamiežniki», — takoje paviedamleńnie zaŭvažyŭ «Fłahštok».
Jak paviedamili «Lusterku» čytačy, padobnaje adbyvajecca i na trasie M-1 la miažy: pavodle infarmacyi čytača, tam kala strachavych kijoskaŭ uviečary ŭ čacvier pačali pracy i ŭžo pastavili pamiežny punkt: para vahončykaŭ dla pamiežnikaŭ, čatyry šłahbaŭmy, zaharadžalnaja stužka z šypami.
Infarmacyju pacvierdzili ŭ Dziaržpahrankamitecie, paviedamlaje «Lusterka».
«Zhodna z zakanadaŭstvam ab orhanach pamiežnaj słužby, na ŭjeździe ŭ Respubliku Biełaruś ciapier budzie vieścisia pravierka dakumientaŭ», — adkazali vydańniu.
«Heta časova», — padkreślili ŭ viedamstvie.
Pa słovach pradstaŭnika DPK, kantrol budzie dziejničać «da asablivaha rasparadžeńnia».
U telehram-kanałach paviedamlajuć, što na miažy ŭžo sapraŭdy źjavilisia čerhi daŭžynioj niekalki kiłamietraŭ. Asabliva staranna praviarajuć rasiejcaŭ, pišuć čytačy.
Uviadzieńnie pašpartnaha kantrolu na ŭjezd z Rasii adbyłosia paśla narady Alaksandra Łukašenki ź siłavikami 2 maja paśla dyviersii na čyhuncy ŭ Branskaj vobłaści Rasii.
Vyhladaje, što ŭłady aścierahajucca, što Rasija ŭžo nie kantraluje svaich hranic z Ukrainaj, pra što śviedčać svabodny ŭvachod dyviersijnych hrup u rasijskija vioski, a taksama padryvy čyhunki. Minsk choča pierastrachavacca, kab praź niekantralavanuju miažu z Rasijaj zbroja i dyviersanty nie traplali ŭ našu krainu. Łahičny krok u takim razie — uvieści ŭłasny filtr na hranicy.