Зяленскі на наступным тыдні наведае Нямеччыну
Пра падрыхтоўку да візіту паведамілі крыніцы ў сілавых структурах Нямеччыны. Яны рыхтуюцца прыняць борт украінскага лідара 13 мая ў аэрапорце Берліна.
03.05.2023 / 13:56
Уладзімір Зяленскі. Фота: AP
«Прэзідэнт [Украіны] прыедзе ў Нямеччыну на запрашэнне федэральнага прэзідэнта [ФРГ]», — паведамілі крыніцы Bild.
У раёне Патсдамскай плошчы, дзе павінен спыніцца Зяленскі, будуць прынятыя павышаныя меры бяспекі.
14 мая Зяленскага з вайсковымі ўшанаваннямі прыме канцлер ФРГ Олаф Шольц. Па выніках іх перамоў запланавана прэс-канферэнцыя.
Затым украінскі лідар павінен сустрэцца з прэзідэнтам Франк-Вальтэрам Штайнмаерам.
Пасля прэзідэнт Украіны павінен вылецець на верталёце ў Аахен на захадзе краіны, дзе яму ўручаць Міжнародную прэмію імя Карла Вялікага. Пасля гэтага ён вернецца ва Украіну.
Аднак крыніцы Bild у сілавых структурах не выключаюць, што візіт давядзецца адмяніць у самыя кароткія тэрміны праз сітуацыю ва Украіне.
Сёння Уладзімір Зяленскі знаходзіцца з візітам у Фінляндыі.
З пачатку поўнамаштабнага ўварвання Расіі ва Украіну Уладзімір Зяленскі наведаў пяць замежных краін: ЗША, Польшчу, Вялікабрытанію, Бельгію і Францыю. Прычым першы візіт быў здзейснены толькі ў снежні.