Pa canie dźviuch kvater u Minsku. Jakija kiempiery pradajuć u Biełarusi
Kiempinh — mara mnohich siamiej, junakoŭ i dziaciej. Pahladzieli, jakija kiempiery, u tym liku samarobnyja, prapanuje biełaruski rynak.
01.05.2023 / 14:49
Patrabuje inviestavańnia
Samy tanny aŭtamabil, jaki choć i davoli ŭmoŭna, ale možna nazvać kiempinham, pradajecca za 2000 dalaraŭ. Heta Volkswagen Transporter T3 1981 hoda vypusku z aryhinalnym sałonam ad sapraŭdnaha kiempiera.
Fota tut i dalej: av.by
Praŭda, kab hety 42-hadovy mikraaŭtobus zmoh stać sapraŭdnym domam na kołach daviadziecca prykłaści ruki i inviestavać niamała hrošaj. Ciapier jon vielmi addalena nahadvaje miesca dla adpačynku, choć i maje ŭ sałonie nabor mebli, siadzieńnie jakoje raskładajecca ŭ łožak i niešta padobnaje da kuchni.
Da taho ž, jak paznačana ŭ abjavie, ciapier aŭtamabil nie na chadu. Mikraaŭtobus znachodzicca ŭ Minsku.
U rodnaj farbie
Za 5990 dalaraŭ u stalicy pradajecca sapraŭdny kiempier Fiat Ducato 1990 hoda vypusku.
«Aŭtamabil u vydatnym stanie dla svajho ŭzrostu. Pa kuzavie prablem niama, mašyna ŭ rodnaj farbie. Ruchavik biez prablem. Tolki svoječasovaje i jakasnaje absłuhoŭvańnie», — apisvaje pradaviec svoj 33-hadovy dom na kołach.
Unutry kiempiera jość usio nieabchodnaje dla žyćcia: kuchnia, ladoŭnia, stoł, kresły. Na dachu mieścicca spalnaje miesca.
Mikraaŭtobus abstalavany pryładaj dla pieravozki troch rovaraŭ.
Pradajecca praz adjezd ź Biełarusi
U Maładziečnie za 7077 dalaraŭ pradajecca samarobny kiempier, pierarobleny z hruzavička Iveco 1994 hoda vypusku.
U mikraaŭtobusie majecca try spalnyja miescy. Miescaŭ dla siadzieńnia taksama try. Unutry jość pracoŭny stoł, chaładzilnik, hazavaja plita na 2 fajerki, myjka, baki dla čystaj i brudnaj vady, šafa, antresoli.
Haspadar samarobnaha kiempiera adznačaje, što pryčyna prodažu — pierajezd ź Biełarusi.
Mahčymy abmien
U Homieli pradajecca paŭnavartasny kiempier Peugeot J5 1986 hoda vypusku. Prosiać za jaho 11 tysiač dalaraŭ.
Zvonku dla svaich hadoŭ mikraaŭtobus vyhladaje davoli badziora. Pierad uvachodam u kabinu raskładajecca stolik z naviesam.
Pakolki pa płoščy hety kiempier značna bolšy za papiarednija vyryjanty, to ŭ im znajšłosia miesca i dla tualeta.
U abjavie paznačana, što pradaviec hatovy razhladzieć roznyja varyjanty abmienu z dapłataj u jahony bok.
Mara salaravoza
Jašče bolš jomisty kiempier u ekskluziŭnaj afarboŭcy pradajuć u Kobrynie. Za Fiat Ducato 1992 hoda vypusku z topavym dla takoha aŭto ruchavikom abjomam 2.8 litry prosiać 17 tysiač dalaraŭ.
Dom na kołach abstalavany paliŭnym bakam na 220 litraŭ, što robić jaho maraj nie tolki dla padarožnikaŭ, ale i dla žycharoŭ pamiežža, jakija zarablajuć na vyvazie paliva.
U hetym kiempiery znajšłosia miesca nie tolki dla tualeta, ale i dla duša.
Taki kiempier budzie dobra pasavać dla padarožžaŭ ź dziećmi, bo aproč vialikaha spalnaha miesca ŭnizie, tut jość jašče adzin spalnik nad kabinaj. Abahravajecca kiempier hazam.
«Šyšyha» z ruchavikom ad Mercedes
Za 20 tysiač dalaraŭ u Minsku pradajuć samarobny dom na kołach pabudavany na bazie HAZ-66. Hruzavik byŭ vypuščany ŭ 1991 hodzie.
U apisańni da staroha savieckaha paŭnapryvadnaha hruzavika paznačana, što zamiest zavadskoha, u im ustalavany dyzielny ruchavik i karobka pieradač ad Mercedes. Zajaŭleny raschod paliva 16 litraŭ na sotniu.
Unutry jość duš, sanvuzieł, kuchonny kutok, spalnyja miescy, suchi fien (piečka). Aŭtamabil abstalavany dvuma bakami ź nieržaviejučaj stali dla čystaj i brudnaj vady.
Kiempier ź videanazirańniem
Dalej pa cenach iduć užo sučasnyja aŭtadamy. Samy tanny ź ich — paŭnavartasny kiempier Fiat Ducato 2007 hoda vypusku za $39 000.
«Šeść spalnych miescaŭ, 2 televizara, android-prystaŭka, Wi-Fi uzmacnialnik, USB razietki, inviertar, kavamašyna, vialiki chaładzilnik, duchavaja šafa, tualet, dušavaja kabina, chałodnaja, haračaja vada, detektar hazu», — havorycca ŭ apisańni da aŭtadoma.
Vakoł kiempiera ŭstalavany biespravadnyja videakamiery. Na tylnaj vosi ŭstanoŭlena pnieŭmapadvieska. Aŭtadom pradajecca ŭ Homieli.
Siarod sučasnych kiempieraŭ pradajucca dva aŭtadamy, pabudavanyja na bazie celnamietaličnaha furhona pa cenach 49 990 — 55 000 dalaraŭ.
Sychodziačy z apisańnia, adzin ź ich zusim niadaŭna byŭ pryviezieny ź Jeŭropy.
Dom na kołach pa canie dźviuch kvater u Minsku
Što tyčycca samaha darahoha aŭtadoma, vystaŭlenaha na prodaž u našaj krainie, to možna adznačyć, što zamiest doma na kołach možna nabyć adrazu dvie kvatery ŭ Minsku.
Za Adria Sonic 600 SC, pabudavany na bazie Fiat Ducato apošniaha pakaleńnia, prosiać 109 tysiač dalaraŭ.
«Ciopłaja padłoha, maskitnyja sietki i ralety na ŭsich voknach i lukach, vializarny vanny pakoj ź vialikaj dušavoj, aciapleńnie na hazie i na elektryčnaści, markiza, vialiki chaładzilnik, elektrapadnožka, vielizarnaja kolkaść skrynak, konturnaje padśviatleńnie, sensarnyja śviacilni, šmat razietak na 220V i USB», — havorycca ŭ apisańni da samaha darahoha kiempinha ŭ Biełarusi.
U kiempinhu jość dva dvuchmiesnyja łožki. Adzin — na nižnim uzroŭni ŭ tylnaj častcy kiepmiera, druhi — uviersie nad miescam dla kiroŭcy i pasažyra.
Pradaviec adznačaje, što hety luksavy kiempier nie maje prabiehu pa krainach SND i moža być pradadzieny ŭ RF biez apłaty dadatkovych mytnych płaciažoŭ.
Čytajcie taksama:
U Biełarusi raście kolkaść aŭto ŭ prodažy. Čamu tak adbyvajecca? Tłumačać hulcy rynku