Lon — supierfud
Hetaja raślina zdaŭna akulturanaja ludźmi. Ź jaje vyrablali vałokny i alej. Pieršyja zhadki pra vykarystańnie lonu ŭ lačebnych metach adnosiacca da VI stahoddzia. U apošni čas nasieńnie lonu zavajoŭvaje bolš i bolš prychilnikaŭ. Raspaviadajem, u čym karyść i jak jaho ŭžyvać.
24.04.2023 / 09:05
Čym bahataje nasieńnie lonu
Karyść nasieńnia lonu abumoŭlenaja najaŭnaściu ŭ im šerahu vitaminaŭ, siarod jakich Je, S, vitaminy hrupy V. Lon źjaŭlajecca krynicaj takich minierałaŭ, jak kalcyj, mahnij, fosfar, miedź i cynk. U im vysokaje ŭtrymańnie amieha-3 kisłot.
U nasieńni prysutničajuć jak rastvaralnyja (kamiedź, piekcin) tak i nierastvaralnyja (celułoza, lihnin) charčovyja vałokny.
Akramia hetaha nasieńnie — krynica białku. Pa hetamu pakazčyku jaho možna paraŭnać z nasieńniem soi. Lon bahaty na lihnany, jakija zjaŭlajucca antyaksidantami i vałodajuć estrahiennaj aktyŭnaściu.
Lekavyja ŭłaścivaści lnianoha aleju
Jašče ŭ staražytnaści našy prodki vykarystoŭvali alej ź lonu dla lačeńnia jazvy straŭnika i piakotki.
Siońnia nasieńnie lonu daktary rekamiendujuć uklučać u racyjon ludziam z parušeńniem pałavych harmonaŭ. Dziakujučy lihnanam lon dapamahaje rehulavać kancentracyju estrahienaŭ. Isnuje mierkavańnie, što dziakujučy hetaj ułaścivaści, nasieńnie lonu varta prymianiać pry prafiłaktycy harmanalna zaležnych vidaŭ raku (naprykład, raku hrudziej ci jaječnikaŭ).
Nasieńnie lonu dapamoža palehčyć simptomy padčas mienapaŭzy i postmienapaŭzy. Jaho rekamiendujuć ludziam, jakija drenna pieranosiać zamiaščalnuju harmanalnuju terapiju. Lihnany abaraniajuć ad raźvićcia asteaparozu paśla mienapaŭzy.
Prafiłaktycy raku sadziejničajuć taksama antyaksidanty, na jakija bahataje lnianoje nasieńnie. Dabratvorny efiekt zaŭvažny i ŭ chvorych.
Daśledavańni na žyviołach pakazali, što dabaŭleńnie nasieńnia ŭ racyjon źnižaje rost rakavych puchlin. Jano ž uzmacniała dabratvorny efiekt lačeńnia preparatami. Najbolšaja efiektyŭnaść (u dadatak da harmanalna zaležnych vidaŭ raku) zaŭvažanaja ŭ chvorych na rak pramoj kiški i padstraŭnikavaj załozy.
Vučonyja dakazali stanoŭčy ŭpłyŭ nasieńnia lonu pry prafiłaktycy cukrovaha dyjabietu. Pryniaccie 10 hramaŭ zmołataha nasieńnia našča pryvodzić da značnaha źnižeńnia ŭzroŭniu hlukozy ŭ kryvi.
Dabaŭleńnie nasieńnia ŭ ježu dapamoža ŭ zmahańni ź lišnimi kiłahramami. Dziakujučy leptynu, jaki ŭtrymlivajecca ŭ nasieńni, źnižajecca apietyt. A dziakujučy vysokamu ŭtrymańniu klatčatki, lon padtrymlivaje pravilnuju pracu kišečnika.
Nasieńnie rekamiendujecca ŭ pieršuju čarhu ludziam, jakija cierpiać na zapory, a taksama tym, chto maje sindrom razdražnionaha kišečnika.
A dziakujučy tamu, što nasieńnie pry ŭzajemadziejańni z vadoj utvaraje śliź, jakaja vałodaje pokryŭnymi ŭłaścivaściami, nastoj z nasieńnia pry pryjomie ŭnutr abvałače scenki straŭnika i abaronić jaho ad škodnaha ŭździejańnia antybijotykaŭ, a taksama dapamoža pry lačeńni sistemy stravavańnia.
Vučonyja zaŭvažyli karysnaje ŭździejańnie lonu ŭ prafiłaktycy sardečnych zachvorvańniaŭ, źnižeńni ryzyki pieršaha i druhoha infarktu mijakarda, pavyšanaha cisku.
Dziakujučy amaha-3 kisłotam, lnianoje nasieńnie rajać užyvać pry vysokim uzroŭni chalesterynu. Jano źnižaje ryzyku raźvićcia išemičnaj chvaroby serca, palapšaje zrok, ełastyčnaść myšc i tryvałaść sasudaŭ.
Sposaby ŭžyvańnia nasieńnia lonu i lnianoha aleju
Nasieńnie lonu možna jeści syrym ci absmažanym. U hetym vypadku jaho lepš zapić jakoj-niebudź vadkaściu kab papiaredzić uzduccie žyvata.
Nasieńnie źmiešvajuć ź johurtam, pasypajuć buterbrody ci dabaŭlajuć u sałat, farš dla katlet.
Treba, adnak, viedać, što lepš spažyvać nasieńnie cełym. Zdrobnienaje chutka akiślajecca i tracić svaje charčovyja kaštoŭnaści.
Raspaŭsiudžanaj praktykaj zjaŭlajecca hatavańnie nastoju. Dla hetaha dźvie čajnyja łyžki nasieńnia zalivajuć šklankaj (250 mł) vady i zatym 10 chvilin kipiaciać. Atrymany advar rekamiendujuć pić pierad snom na praciahu 2-3 tydniaŭ.
Lniany alej užyvajuć chałodnym, bo ad uździejańnia tempieratury jon tracić svaje pažyŭnyja jakaści. Možna jaho źmiašać z drobna narezanaj cybulaj ci časnykom. Takuju sumieś možna ŭžyvać z tvarahom, dadavać u sałaty abo zapraŭki da ich.
Daktary rekamiendujuć za adzin raz užyvać nie bolej za dźvie čajnyja łyžki nasieńnia. Dzionnaja norma nie pavinna pieravyšać čverci šklanki.
Kamu nielha jeści nasieńnie lonu i lniany alej
Da ŭžyvańnia nasieńnia lonu treba padychodzić aściarožna ciažarnym i tym, chto kormić hrudnym małakom, žančynam, ludziam, jakija pakutujuć ad nieprachodnaści kišečnika, tym, u kaho parušanaje zhusańnie kryvi, ci tym, chto prymaje preparaty dla razredžvańnia kryvi, chvorym na cukroŭku, a taksama tym, chto maje panižany kryviany cisk.
Čytajcie jašče:
Krapiva, miedunica, makryca dy inšaje pustazielle, jakoje ŭzbahacić vaš stoł
Čufa: hety ziemlany arech vydatna raście ŭ biełaruskich umovach. Pasadzicie, i vam spadabajecca
Fizalis, ci Załataja jahada. Pačnicie vyroščvać, i nie paškadujecie