Palitviaźnia Vadzima Hurmana, jaki maje surjoznyja prablemy sa zrokam, katujuć u horackaj kałonii
Pa infarmacyi pravaabaroncaŭ, za apošnija niekalki miesiacaŭ palitźniavoleny Vadzim Hurman z Maładziečna adbyŭ jak minimum 35 sutak u ŠIZA, 21 ź jakich — bieśpierapynna. Apošnija 14 sutak jamu pryznačyli za admovu źniacca ŭ videa dla kamisii pa pamiłavańni, na jakim treba było pryznać svaju vinu.
19.04.2023 / 17:13
Ad pieraachaładžeńnia ŭ štrafnym izalatary ŭ Vadzima navat zdaryłasia bradzikardzija (stan sercavaj ciahlicy, kali častata jaje skaračeńniaŭ składaje mieniej za 60 udaraŭ za chvilinu).
Akramia hetaha, pavodle byłoha viaźnia, supracoŭniki kałonii niekalki dzion tamu źbivali chłopca nahami ciaham šaści hadzin, a potym chałodnaj vadoj pryvodzili jaho da śviadomaści.
Vadzima Hurmana aryštavali 11 žniŭnia 2020 hoda. Jaho abvinavacili pa dvuch artykułach Kryminalnaha kodeksa: č. 1 art. 342 (arhanizacyja abo aktyŭny ŭdzieł u hrupavych dziejańniach, jakija hruba parušajuć hramadski paradak) i art. 364 (hvałt albo pahroza prymianieńnia hvałtu ŭ dačynieńni da supracoŭnika orhanaŭ unutranych spraŭ).
8 lutaha 2021 hoda ŭ sudzie Maładziečanskaha rajona suddzia Volha Dubovik prysudziła Hurmanu try hady i šeść miesiacaŭ pazbaŭleńnia voli ŭ kałonii ahulnaha režymu.
U Hurmana jašče da źniavoleńnia byŭ vielmi kiepski zrok. U jaho była nieapierabielnaja atrafija zrokavych niervaŭ abodvuch vačej: adno voka bačyła na 12%, druhoje — na 23%. Kožnyja čatyry miesiacy jon musić znachodzicca na abśledavańni: inakš da 30 hod jamu prahnazavali poŭnuju ślepatu. Da taho ž, Vadzim baksior, i ŭ jaho było adpłastavańnie siatčatki.
Čytajcie taksama:
Čałaviek, jaki tolki prajšoŭ Akreścina, raskazaŭ, što takoje karusieli