Мінздароўя абнавіла патрабаванні да грамадскіх прыбіральняў
З 16 красавіка ўступіла ў сілу пастанова Міністэрства аховы здароўя Беларусі, у якой сярод іншага рэгламентуецца камплектацыя грамадскіх прыбіральняў.
18.04.2023 / 19:33
Згодна з гэтым дакументам, інжынерныя камунікацыі, сантэхнічнае і іншае абсталяванне ў гарадскіх прыбіральнях павінны быць спраўнымі, а падлогі, столі, сцены, дзверы і вокны — без дэфектаў і пашкоджанняў.
У кожнай грамадскай прыбіральні павінны быць у наяўнасці ёршык, смеццевае вядро, туалетная папера з трымальнікам, накладное сядзенне для ўнітаза, рукамыйніца, гарачая і халодная вада, а таксама дазатар з вадкім мылам і электраручнікі або аднаразовыя папяровыя сурвэткі.
Індывідуальныя кабіны павінны быць з дзвярыма, якія знутры зачыняюцца на зашчапку. Там жа размяшчаюцца кручкі для адзення і сумак.
Рэгламентуецца і прыбіранне памяшканняў — не радзей чым адзін раз на суткі.
Асобным пунктам агаворваецца, дзе грамадскія прыбіральні павінны быць бясплатнымі. У першую чаргу гэта памяшканні ў грамадскіх будынках, на аўтазапраўках, у гарадскіх парках, батанічных садах, на пляжах і на рынках.
Чытайце таксама:
Беларусь далёка абышла Расію па колькасці прыбіральняў з каналізацыяй