Hamieapatyju i inšyja mietady nietradycyjnaj miedycyny dahetul uklučajuć u pieralik płatnych pasłuh u dziaržaŭnych klinikach
U abnoŭlenym pieraliku płatnych pasłuh dziaržaŭnych balnic i paliklinik zastalisia hamieapatyja, lačeńnie pčołami, pjaŭkami i inšyja nietradycyjnyja pracedury. Takija mietady mnohija ŭ miedyčnym asiaroddzi ličać sumnieŭnymi.
14.04.2023 / 16:35
Hamieapatyčnyja leki. Fota: urologexp.com
U vydadzienaj 10 krasavika uradam pastanovie — pieralik płatnych pasłuh, jakija mohuć akazvać dziaržaŭnyja miedycynskija ŭstanovy. Niekatoryja z hetych pracedur u miedyčnym asiaroddzi ličacca psieŭdamiedycynaj, a ŭ samim dakumiencie nazyvajucca «nietradycyjnymi mietadami akazańnia dapamohi». Tak, u pieraliku zhadvajecca hamieapatyja, hirudaterapija (lačeńnie pjaŭkami), apiterapija (lačeńnie pčołami).
Hetyja mietady i raniej uklučali ŭ pieralik płatnych pasłuh.
Frahmient uradavaj pastanovy ź pieralikam płatnych pasłuh, u jakim zhadvajucca nietradycyjnyja mietady miedyčnaj dapamohi (punkt 4). Skan z pravo.by
Siarod daktaroŭ taki padychod vyklikaje dyskusiju.
«Miedycyna — heta navuka, jakaja hruntujecca na dokazach, efiektyŭnaści tych, ci inšych mietadaŭ lačeńnia i dyjahnostyki chvarobaŭ. Kali jość dokazy taho, što mietad efiektyŭny i biaśpiečny, to jon prymajecca i vykarystoŭvajecca. Kali niama dokazaŭ, to heta nie miedycyna…» — tłumačyć praktykujučy doktar Vadzim.
Pavodle jaho, mietady nietradycyjnaj miedycyny słužać dla zarablańnia hrošaj. A užyvańnie va ŭradavaj pastanovie terminu «nietradycyjnaja miedycyna» — markier kvalifikacyi słužboŭcaŭ, jakija jaje składali.
Na jaho pohlad, u pastanovie najpierš varta było zhadać zapatrabavanyja i važnyja dla pacyjentaŭ pasłuhi (ich pryviali paśla hamieapatyi).
Cikava, što ŭ 2017-m kamisija pa baraćbie ź iłženavukaj i falsifikacyjaj navukovych daśledavańniaŭ pry Rasijskaj akademii navuk pryznała hamieapatyju — lačeńnie zvyšmałymi dozami lekavych srodkaŭ — antynavukovym.
Dadatak da pastanovy ŭradu ad 10 krasavika 2023 hodu № 182 z abnoŭlenym pieralikam płatnych pasłuh byŭ apublikavany ŭ telehram-kanale Ministerstva achovy zdaroŭja, ale potym jaho čamuści prybrali.
Hladzicie taksama:
«Pandemija i represii ŭzarvali sistemu». Daktary raskazvajuć, jak źmianiłasia miedycyna za try hady